Artan Fuga zbulon tre arsyet përse opozita nuk bashkohet më: Brenda grupeve të PD është konsumuar “divorci”

Profesori i njohur Artan Fuga, i ftuar këtë pasdite në rubrikën “Opinion” ka analizuar arsyet se përse mendon se nuk do të ketë një bashkim mes opozitës së përçarë.

Sipas Fugës është “konsumuar ‘divorci’” dhe nuk ka më kthim pas për t’u bashkuar.

“Nuk e di por brenda opozitës ka ngërçe të mëdha, frenime, pengesa, sigurisht nuk mundem t’i fryjë pesimizmit dhe të them se nuk ka zgjidhje, sepse historia, ngjarja politike sjell rezultate shpesh here të paparashikuara, problemi që gjykojmë atë që ndodh sot.

Shikoj se kjo gjendje në Kuvend, mes deputetëve të opozitës që është e përçarë, është çështje që do vijojë të paktën deri në 3 vitet e ardhshme, deri në afatet e një mandati tjetër. Sepse shikoj brenda tre grupeve të PD që ‘divorci’ është konsumuar dhe s’ka kthim pas.

Pse them është konsumuar, e para se është çështja non-grata e Berishës, për këtë kemi ndarje në dy grupe brenda PD, e dyta ka ndodhur që në Rithemelimin e PD disa deputetë kanë marrë pjesë e disa jo, ata që nuk kanë qenë nuk mund të kthehen më sepse janë të margjinalizuar, edhe pse u thuhet se i kanë dyert hapur. Grupi i Alibeajt nuk përfaqëson PD nga pikëpamja e elektoratit, s’ka mbështetje, mund të bëjë një parti tjetër… Çfarëdo vendimi të marrë Gjykata për logon, nuk kthehet më ky problem, është çështje politike jo gjykate. E treta, çarja e madhe e elektoratit të PD, pakënaqësitë prej 10 vitesh prej lidershipit të mëparshëm”, tha Fuga.