Berisha kërcënon policinë, Veliajn dhe Ramën, nuk tërhiqet edhe pse nuk ka leje për protestën e 6 dhjetorit, kreu i “Foltores” paralajmëron dhunë tek Kryeministria

Pas Policisë së Shtetit, edhe Bashkia e Tiranës nuk e lejon grupimin e “Rithemelimit” të njohur gjerësish me etiketimin “Foltore” që të mbajë në Bulevardin Dëshmorët e Kombit protestën më 6 dhjetor, kur në Tiranë mblidhen edhe liderët europianë. Megjithatë, Bashkia i sugjeron ish-kryeministrit Sali Berisha që protestën e tij ta mbajë në sheshin “Skënderbej”. Bashkisë kërkon një përgjigje nga Rithemelimi nëse do të bien dakord me propozimin për ta zhvilluar në sheshin “Skënderbej”. “Bashkia Tiranë e ka të pamundur t'iu pajisë me një leje për zënien e hapësirës publike për zhvillimin e tubimit që ju kërkoni të zhvilloni në Bulevardin "Dëshmorët e Kombit". Duke qenë se për shkak të zhvillimit të samitit të Bashkimit Evropian në qytetin e Tiranës, pjesa më e madhe e rrugëve në qytet do jenë në funksion të mbarëvajtjes së këtij samiti, duke mos cenuar të drejtën tuaj për tubime, ju propozojmë zhvillimin e tij pranë Sheshit Skënderbej. Për sa me sipër, nëse jeni dakord me këtë propozim, na bëni sa me shpejt me dije, që Bashkia Tiranë të vijoj me lëshimin e lejes përkatëse për zhvillimin e këtij tubimi”, thuhet në përgjigjen e Bashkisë, drejtuar “Rithemelimit”.

Berisha i përgjigjet Bashkisë së Tiranës

Por e menjëhershme ishte përgjigjja e Berishës, i cili në një dalje për mediat, pasi bojkotoi mbledhjen e dy Kuvendeve Shqipëri-Kosovë, nuk ndryshoi qëndrimin e tij, duke thënë se protestën do e zhvillojnë para Kryeministrisë dhe madje me tone të forta ai kërcënoi kryebashkiakun Erion Veliaj, policinë dhe kryeministrin Edi Rama, duke iu kërkuar që të mos i fusin hundët. “6 dhjetori protesta më e madhe do mbahet para Kryeministrisë, bashkia të mos përzihet se s’ka forcë në botë që mund të pengojë. Ramës i intereson dhuna atë ditë por bën mirë që as dyert të mos i blindojë se do bëjë lajm botëror. Jemi në protestë pro samitit dhe kundër Ramës”, u shpreh ai. Ndërkohë edhe më herët Berisha deklaroi se opozita do ta zhvillojë protestën e saj më datë 6 dhjetor. Në një video live, aty ku iu përgjigj pyetjeve të qytetarëve, Berisha theksoi se vendimi i policisë për t'i ndaluar është nul, e se asgjë nuk i ndalon dot që të protestojnë. “Mendoj se në format e ndryshme të mosbindjes civile do bëhen. Po ne jemi në një proces paralel, primaret. Ato përbëjnë procesin në të cilin përcakton dhe vendos vullnetin e lirë të qytetarëve shqiptarë. Ne do vazhdojmë betejën tonë të pandërprerë. Policia njoftoi se nuk njeh kushtetutën dhe ligjet. I rikujtoj vasalëve të Ramës se Kushtetuta nuk njeh kufizime për protesta, ka një vendim të GJK në të cilën vendos se protestuesi nuk ka detyrim të njoftojë policinë. Ai refuzim është nul, tregon fytyrën e vërtetë të këtij regjimi. Me datën 6 në orën 12:00, qytetarët do të mbushin Tiranën”, u shpreh ai.

Kryefoltoristi kërcënon Ramën

Më tej ish-kryeministri Sali Berisha premtoi se “Foltorja” e drejtuar prej tij nuk e dorëzon flamurin e Partisë Demokratike. Gjatë video-live me qytetarët në Facebook, Berisha theksoi se Rama i ka bërë llogaritë gabim nëse mendon se do dorëzohet PD. “Edi Rama po bën gjithçka të konfiskojë flamurin e PD. PD nuk e dorëzon flamurin e saj. Edi Rama i ka bërë llogaritë gabim. Hakmarrës primitiv, ai kërkon të fshijë partinë që përmbysin pushtetin e etërve të tij, që anëtarësoi Shqipërinë në NATO dhe shtroi rrugën e integrimit, që transformoi infrastrukturën e këtij vendi dhe realizoi projekte madhështore në Europë siç është TAP. Rama ka një armiqësi të pashuar ndaj kësaj partie. Nuk e harron ai kurrë 20 shkurtin. Kjo betejë vazhdon. Ai kujton se do hakmerret, por i ka llogaritë gabim”, nënvizoi ish-kryeministri Sali Berisha.