Berisha sulmon Yuri Kim për heshtjen ndaj skandalit “McGonigal”, e krahason me ish-agjentin e korruptuar, kërkon nga FBI që ta hetojë

Ish-kryeministri Sali Berisha sulmoi ambasadoren amerikane, Yuri Kim, për heshtjen e mbajtur ndaj skandalit “McGonigal”. Në një dalje për mediat, Berisha u tregua i ashpër me diplomaten amerikane duke thënë se është e korruptuar njësoj si vetë ish-agjenti i FBI i arrestuar në SHBA, Charles McGonigal. "Kodi i heshtjes po zbatohet edhe nga guvernatorja, e cila nuk ka lënë gjë pa komentuar. Tani për një ngjarje që ka tronditur thellë botën, nuk shqipëron një fjalë të vetme. Si është e mundur kjo? Çfarë interesash përfaqëson guvernatorja? A mund të shpjegojë kush? A ka shqiptar që nuk pret një reagim të saj për këtë ngjarje? Në llojin e saj, guvernatorja është një McGonigal, ndaj të cilës janë shumë akuza për të gjitha format e korrupsionit”, tha fillimisht Berisha. Në fund, kreu i “Foltores” kërkoi që FBI të hetojë Yuri Kim dhe lidhjet e saj me McGonigal, Agim Nezën, Dorian Duçkën, Edi Ramën dhe nëse kanë bashkëpunuar për koncesione korruptive nafte e të tjera. “Ndaj u bëj thirrje FBI, agjencive të tjera të SHBA, të hetojnë se cilat kanë qenë qëndrimet e saj ndaj McGonigal. Ka informuar ajo vendin e vet për takimet që ai ka pasur, për veprimtarinë e tij, për vizitat e shpeshta në Shqipëri? Ka informuar ajo për Deripaskën në Shqipëri, për kompanitë e tij që fryheshin si shushunja në Shqipëri, paçka se prej katër vitesh ishin nën sanksione të rrepta të SHBA? Ka pasur ajo dreka e darka me ekipin Rama-McGonigal. Këto dhe gjëra të tjera janë të rëndësishme për autoritetet e vendit mik për t’i shkuar deri në fund kësaj çështje", tha Berisha.