Fatos Klosi dhe Sabit Brokaj në listën e veteranëve të UÇK, pagë mujore nga Kosova

Ish-kreu i Shërbimit Informativ Shtetëror, Fatos Klosi dhe ish-ministri i Mbrojtjes, Sabit Brokaj, do të marrin një pagë mujore nga shteti i Kosovës si veteranë të Ushtrisë Çlirimtare të Kosovës.   

 

Lista e Shtabit të Përgjithshëm, Komanda - Statusi i veteranit dhe invalidit, është publikuar nga komisioni qeveritar në Prishtinë.

 

Ish-kreu i SHISH, Fatos Klosi theksoi sot se është njoftuar zyrtarisht nga pala kosovare për vendosjen e emrit të tij në listën e veteranëve të UÇK-së.

 

Ndërkaq, Brokaj tha se kishte dijeni që emri i tij mund të jetë në listën e veteranëve, por se nuk i është komunikuar zyrtarisht një fakt i tillë.

 

Përfshirja e tyre në këtë listë dhe dhënia e statusit të veteranit vjen në vlerësim të kontributit që Klosi dhe Brokaj kanë dhënë gjatë konfliktit në Kosovë, përmes detyrave që ata kanë ushtruar. Fatos Klosi ka qenë në krye të Shërbimit Informativ Shtetëror deri në vitin 2002, ndërsa Brokaj ka drejtuar Ministrinë e Mbrojtjes deri në ’99, kohë kur përfundoi lufta në Kosovë me ndërhyrjen e NATO-s. Sabit Brokaj ka qenë edhe Këshilltar i Sigurisë Kombëtare të Presidentit. 

 

Emrat e dy ish-zyrtarëve të lartë të shtetit shqiptar janë të listuar në të njëjtën njësi ku bën pjesë edhe ish-kryeministri i Kosovës, Hashim Thaçi, njëherësh drejtues i UÇK-së, Adem Demaci, Ali Ahmeti, Fatmir Limaj, Jakup Krasniqi dhe Kadri Veseli. 

 

Ali Ahmeti njihet si një nga drejtuesit e Lëvizjes Popullore të Kosovës dhe themelues i Ushtrisë Çlirimtare të Kosovës, si dhe i Ushtrisë Çlirimtare Kombëtare në Maqedoni. Në krye të listës janë vënë eksponentë të PDK-së dhe forcave aleate të saj, si Adem Grabovci, Agim Çeku, Fatmir Limaj, e Jakup Krasniqi.