Kandidatët e parë të PS për zgjedhjet lokalet të 14 majit, konfirmohen disa prej tyre, Vlora mbetet në pikëpyetje, ja tre emrat e mundshëm

Partia Socialiste po merr të gjithë kohën e nevojshme për të përzgjedhur të 61 kandidatët që do të kërkojnë postin e kryebashkiakut në zgjedhjet lokale të 14 majit. Tirana, Shkodra, Elbasani dhe shumë qytete kanë të rikonfirmuar emrat nga radhët e mazhorancës. Në shumicën prej tyre priten të caktohen kryetarët e bashkive në detyrë, të dalë nga zgjedhjet lokale të 30 qershorit 2019, ku mori pjesë vetëm PS. Një dilemë e madhe mbetet përzgjedhja e kandidatit/kandidates së socialistëve për bashkinë e Vlorës, bastion historik i së majtës. Në media po qarkullojnë 3 emra që mund të votëbesohen nga baza socialiste e qytetit bregdetar për të përfaqësuar partinë në zgjedhjet lokale të 14 majit. Skënder Brataj, Vilma Bello dhe Odise Moçka janë 3 emrat që po diskutohen për të garuar në Vlorë.

Të konfirmuarit; nga Veliaj, Llatja, Beci te Tërmet Peçi, ja emrat

Erion Veliaj në Tiranë, Gledjan Llatja në Elbasan, Benet Beci në Shkodër janë konfirmuar publikisht deri tani si kandidatët e selisë rozë në zgjedhjet e radhës për postin e kryebashkiakut. Edhe kryebashkiakja në detyrë e Durrësit, Emirjana Sako do të jetë kandidatë sërish për këtë qytet në 14 maj. Vetë kryeministri ka vendosur që jo vetëm Sako, por dhe të gjithë kryebashkiakët socialistë që fituan postin në zgjedhjet e pjesshme lokale të 6 marsit 2022 në Rrogozhinë, Dibër, Lushnjë, Vorë dhe Dibër, do të votëbesohen sërish nga PS për të kërkuar një tjetër mandat në krye të pushtetit lokal në 14 maj. Për rrjedhojë, Edison Memolla në Rrogozhinë, Rahim Spahiu në Dibër, Eriselda Sefa në Lushnjë dhe Blerim Shera në Vorë do të përfaqësojnë sërish partinë në pushtet në zgjedhjet lokale në këto 4 bashki. Edhe pse kishte shumë pikëpyetje për Armando Subashin në Fier dhe Qerim Ismailajn në Mallakastër nëse do të kandidonin sërish në këto qytete për shkak të skandalit të inceneratorëve dhe dënimit me 40 ditë punë për “falsifikim të formularit të dekriminalizimit” lidhur me një dënim në Greqi në 1999, i deleguari i PS për qarkun Fier, Taulant Balla bëri me dije para 2 ditësh se Subashi dhe Ismailaj janë të preferuarit e PS në këto 2 qytete. Në bashkitë e tjera të Shqipërisë, do të kërkojnë një tjetër mandat Pjerin Ndreu në Lezhë, Flamur Golemi në Gjirokastër. Ndërsa shumë gjasa kanë të rikandidohen: Ilir Xhakolli në Pogradec, Ervin Demo në Berat, Alma Hoxha në Përmet, Adrian Gurma në Sarandë, Kastriot Gurra në Librazhd, Ndrec Dedaj në Mirditë, Arif Tafani në Belsh dhe Tërmet Peçi në Tepelenë.

Gjici dhe Suli në dyshim, Avokati i Shtetit favorit për të garuar në Vlorë  

Të sigurtë që nuk e kanë rikandidimin janë Safet Gjici në Kukës dhe Rakip Suli në Kamëz. Këto bashki kanë gjasa të forta të rimerren nga PD, pasi janë bastione të forta të selisë blu. Për sa i përket Vlorës, ndër 3 emrat e përfolur për t’u përzgjedhur si kandidat i PS në zgjedhjet lokale të 14 majit, më favorite është Avokati i Shtetit, Odise Moçka. Më herët, Moçka ka ushtruar funksionin e drejtorit të Drejtorisë së Përgjithshme të Hetimit Tatimor, ndërsa ka kryer detyrën e specialistit të Antikorrupsionit në Kryeministri. Nga ana tjetër, Skënder Brataj është një mjek me përvojë dhe drejton prej vitesh Shërbimin e Urgjencës Kombëtare. Vilma Bello ushtron aktualisht detyrën e zv/ministres së Turizmit dhe Mjedisit. Në legjislaturën e kaluar, ajo u votua si deputete e Vlorës dhe shërbeu si n/kryetare e grupit parlamentar të PS.
Zv/ministrat kandidatë në zgjedhjet e 14 majit? Ja ç’paralajmëroi Gjiknuri  
Në një intervistë për “Vizion Plus” në 17 janar, Sekretari i Përgjithshëm i Partisë Socialiste dhe njëherazi i deleguari i selisë rozë në Elbasan, Damian Gjiknuri paralajmëroi se në zgjedhjet e radhës, mund të përzgjidhen dhe zv/ministra si kandidatë për disa bashki të vendit. Megjithatë, ai nuk zbuloi emra konkretë.  “Fokusi i PS për gjetjen e kandidatëve do të jetë jashtë grupit parlamentar. Një pjesë e zv/ministrave janë pjesë e strukturave të PS, njerëz të lidhur me terrenin, dhe mund të jetë edhe ndonjë i tillë. Nuk mund të them se tanimë kemi një zv/ministër por nuk do të ishte çudi që edhe mund të kishte të tillë”, bëri me dije Gjiknuri për “Vizion Plus”.