Kandidatja kryesore në krye të “Foltores” Argita Malltezi frymëzohet nga Bashkimi Sovjetik, pas reagimit të Evi Kokalarit, vajza e Sali Berishës fshin postimin, Foltorja hyn në fazën e “ngrënies së vetes së vet”

“Foltorja” është përfshirë së fundmi nga zhvillime të forta. Lufta për poste është ndezur dhe aludimet se Argita Malltezi mund të jetë pasuese e Sali Berishës në krye të Rithemelimit ka bërë që të ndizet fitili i “fuçisë së barutit”. Por Malltezi, që së fundmi nuk i ka fshehur më ambiciet e saj për të trashëguar të atin në krye të Rithemelimit, duket se frymëzohet nga Bashkimi Sovjetik. Dje në një postim në profilin e saj në rrjetin social Facebook, ajo citonte pikërisht Josif Stalinin: “Unë besoj vetëm te një gjë: pushteti i vullnetit njerëzor.” Kjo thënie e Stalinit duket se e ka frymëzuar Argita Malltezi Berishën, duke e tejkaluar edhe babanë e saj, i cili, duhet thënë se, nuk ka pasur guxim kaq të madh për të cituar etërit e tij shpirtëror, madje ka bërë gjithçka për ta fshehur të kaluarën dhe formimin e tij, pavarësisht se në 34 vite nuk ka treguar gjë tjetër vetëm atë se e ka të pamundur të sillet ndryshe nga frymëzuesit e tij. Evi Kokalari ka mbetur e shokuar nga shprehja që ka shpërndarë Argita Malltezi, “Just WOW-Jam pa fjalë! Argita Malltezi Berisha ndan kuotën e Joseph Stalin. Më pas Kokalari thotë se Argita e ka fshirë postimin.

Foltorja hyn në fazën e “ngrënies së vetes së vet”

Nënkryetari i PD-së, Roland Bejko u shpreh dje se Foltorja ka hyrë në fazën e ngrënies së vetes së vet, njerëzit po i ikin dhe zhgënjimi në radhët e saj është i madh. 'Zonja Malltezi është non grata. Unë jam tek PD, ajo është një organizatë familjare. Demokratët shkuan me shpresë se Berisha është më i zoti se Basha. Tani ka zhgënjim. Shkuan disa deputetët së fundmi për kalkulime. Ka filluar leximi mbrapsht edhe prej tyre. Në këto kushte me një parti familjare, partinë e quante pronë të vetën. U çudit pse bënte rezistencë Basha, vajti ta nxirrte me shqelma. Tani është në fazën e ngrënies së vetes. Foltores i mungon kauza. Nuk i qëndroi tezave morale për të cilat njoftoi krijimin. Kështu ra Roma e lashtë, hëngri veten”, tha Bejko. Këtë fakt e konfirmoi vetë Belind Këlliçi, i cili u shpreh së fundmi se si çdo anëtarë i PD-së edhe Argita Malltezi ka të drejtën për të garuar për çdo pozicion, por theksoi se Partia Demokratike nuk e ka luksin për trashëgim të pushtetit, duke dalë kështu hapur kundër kandidaturës së saj. 

Argita e rrezikuar nga drejtësia

Goditja për “Foltoren” do të jetë edhe më e madhe nëse drejtësia nis hetimet edhe për Argita Berishën. Vetë ish-kryeministri tha vitin e kaluar kur dilte dhe mbronte nëpër konferenca fëmijët e tij se Londra e akuzon se ka prova për vajzën e tij, e cila ka vepruar si portiere për investitorët që vinin në Shqipëri. Në dosje, britanikët kanë llogaritë bankare dhe veprimtarinë e vajzës së tij. Pak muaj pasi Sali Berisha u zgjodh kryeministër i Shqipërisë në vitin 2005, vajza e tij Argita Malltezi u kthye në shtëpi nga Prishtina, duke lënë pas një punë të mirë paguar në Misionin e Përkohshëm të Kombeve të Bashkuara në Kosovë, UNMIK, për të hapur një zyrë ligjore në kryeqytetin Tiranë. Duke u bashkuar me një nga miqtë dhe bashkëpunëtorët e saj në UNMIK, Flutura Kola, ata krijuan tre firma avokatësh-Malltezi&Kola, Kola&Associates dhe Malltezi&Associates, duke ndarë një zyrë dhe një listë në rritje të klientëve fitimprurës. Në pak muaj, ata u bënë avokatët e kërkuar për kompanitë shumëkombëshe që kërkonin të investonin në ekonominë shqiptare në rritje të shpejtë. Por ish-klientët pretendojnë se e kanë punësuar Malltezin për lidhjet e saj familjare dhe për të anashkaluar kërcënimet e shantazhit, jo vetëm për aftësitë e saj ligjore. Qëndrimi i Berishës si kryeministër i Shqipërisë nga viti 2005 deri në vitin 2013 u shënua më shumë nga skandale korrupsioni sesa ndershmëri. Malltezi&Kola u përfshinë në disa prej akuzave më së shumti për rolin e firmës në aferën Fazlliç dhe Argita Malltezi u akuzua nga opozita se vepronte si portiere e kryeministrit. Malltezi konsiderohej gjerësisht si një eminencë në qeverinë e babait të saj. E tillë ajo përshkruhet në dy memorandume të brendshme të Ambasadës Amerikane në Tiranë në atë kohë, të cilat u publikuan nga faqja e internetit Wiki Leaks.