Kërcënon Ministri i Jashtëm grek: Do bëjmë gjithçka për lirimin e Belerit, Shqipëria të respektojë rregullat nëse e do BE-në

Greqia është e vendosur t’i shkojë deri në fund çështjes së lirimit të fituesit të zgjedhjeve lokale të 14 majit në Himarë, Fredi Beleri. Ky qëllim u konfirmua hapur ditën e djeshme nga Ministri i Jashtëm i shtetit helen, Jorgos Gerapetritis gjatë fjalimit të tij në parlamentin grek. Ai përsëriti kushtin e Greqisë se Shqipëria duhet të lirojë nga burgu anëtarin e minoritetit grek dhe OMONIA-s në mënyrë që të mos pengojë rrugën drejt anëtarësimit në Bashkimin Europian. Prej afro 1 muaji, dy shtetet fqinje po përplasen ashpër me njëra-tjetrën lidhur me arrestimin për shitblerje votash të Fredi Belerit, kandidatit nga radhët e koalicionit opozitar “Bashkë Fitojmë” në zgjedhjet e fundit lokale në vend. Greqia sulmon shtetin shqiptar se ka burgosur Belerin për qëllime politike, jo vërtet juridike, kurse pala shqiptare i ka kërkuar shtetit helen të mos nxitohet me deklarata të pavenda, por të respektojë punën e organeve tona të drejtësisë. Së fundmi, partia që sapo u konfirmua në pushtet në Greqia, Demokracia e Re ka futur një amendament në raportin e Partive Popullore Europiane për ecurinë e procesit të negociatave për anëtarësim në BE, ku kërcënon Shqipërinë me lirimin e Fredi Belerit, ndryshe do vendosë bllokadë lidhur me aspiratat evropiane të shtetit tonë. Zëdhënësi i qeverisë së kryeministrit Kiriakos Mitsotakis, Pavlos Marinakis e konsideroi arrestimin e Belerit si sjellje racizmi shtetëror të Shqipërisë ndaj minoritetit helen.

Gerapetritis: Do bëjmë gjithçka që të lirojmë Belerin, Shqipëria të respektojë ligjet

Në fjalën e tij përpara deputetëve të Parlamentit grek, shefi i ri i diplomacisë Jorgos Gerapetritis u shpreh në formë imponuese ndaj shtetit shqiptar se duhet të respektojë të drejtat e njeriut lidhur me burgosjen e Fredi Belerit. Nëpërmjet mbrojtjes së vijës diplomatike të Greqisë në kontribuim të anëtarësimit të rajonit të Ballkanit Perëndimor në BE, ai vuri kusht që shteti shqiptar të lirojë menjëherë Belerin, pasi në rast të kundërt, rrezikon avancimin e negociatave për anëtarësim në Europën e Bashkuar. Pasuesi i Nikos Dendias premtoi se shteti helen do të bëjë gjithçka nëpërmjet presioneve diplomatike për ta nxjerrë nga qelia fituesin e zgjedhjeve lokale në Himarë. Sipas Gerapetritis, sjellja e shtetit shqiptar karshi Belerit nuk i shkon për shtat as rregullave të familjes së madhe evropiane, ku shteti dhe populli aspirojnë për të shkuar një ditë. “Greqia mbetet e përkushtuar ndaj zhvillimit, sigurisë dhe prosperitetit të Ballkanit Perëndimor dhe 20 vjet pas Samitit të Selanikut, do të vazhdojë të ndërmarrë iniciativa për të përshpejtuar rrugën evropiane të vendeve ballkanike. Sidomos në lidhje me Shqipërinë, do të bëjmë gjithçka që është e nevojshme për t’i dhënë fund ndalimit të përkohshëm të kryetarit të zgjedhur të Himarës, Fredi Beleris. Shqipëria duhet të respektojë rregullat e shtetit ligjor, nëse dëshiron vërtet të bëhet anëtare e familjes europiane”, deklaroi ministri grek Gerapetritis dje në Parlamentin grek.

Ç’ka ndodhur deri tani me Belerin? Drejtësia nuk e la të betohej si kryebashkiak

Fredi Beleri, kandidati i koalicionit “Bashkë Fitojmë” dhe nga OMONIA, është burgosur që prej 12 majit me akuzën e shitblerjes së votave (40 mijë lekë për 8 vota). Megjithatë, edhe pse i burgosur ai fitoi me 19 vota diferencë ndaj rivalit socialist Jorgo Goro. GJKKO ka refuzuar disa herë lirimin e tij me kusht nga burgu për shkaqe shëndetësore dhe për t’u betuar si kryebashkiak i ri. Beleri dhe shoqëruesi i tij, Pandeli Kokaveshi do gjykohen të dy për veprën penale “korrupsioni aktiv në zgjedhje”. Ata rrezikojnë të dënohen, sipas nenit 328 të Kodit Penal, me 1 deri në 5 vite burg nëse shpallen fajtorë.