Tre gjyqtare kërkojnë të marrin drejtimin e Gjykatës Kushtetuese. Ditën e djeshme ka përfunduar afati i aplikimeve dhe tre prej anëtarëve të Kushtetueses kanë shprehur interes. Mbledhja e Gjyqtarëve të Gjykatës Kushtetuese, në kuadër të procedurës së zgjedhjes së Kryetarit të Gjykatës Kushtetuese u mblodh dje dhe konstatoi përmbylljen e afatit të aplikimeve. Për këtë pozicion kanë shprehur interesin 3 gjyqtare, të renditura më poshtë, sipas rendit alfabetik, me bazë mbiemrin: Fiona Papajorgji, Marjana Semini, Holta Zaça. Gjithashtu, Mbledhja e Gjyqtarëve, në bazë të parashikimeve ligjore, ka vendosur të zhvillojë mbledhjen e saj të radhës, në datën 15 shkurt 2023, ora 10:00, për të dëgjuar platformat dhe vizionin e secilës kandidate, për të vijuar më tej me procedurat e votimit për zgjedhjen e Kryetarit të Gjykatës Kushtetuese. Ndërkohë, gazeta ka mësuar se në prapaskenë po bëhet një “luftë” e fortë në prapaskenë mes ndërkombëtarëve (amerikanëve) dhe mazhorancës, për shkak se kjo e fundit kërkon të emërojë kryetar një besnik të saj, ndërsa Uashingtoni kërkon që t zgjidhet drejtues i këtij institucioni ai që e meriton. Pra, edhe për kreun e ri të Kushtetueses që do pasojë Vitore Tushën, kemi një skenë të ngjashme si me kreun e ri të SPAK, ku SHBA u përplas me kryeministrin Edi Rama.
Zgjedhja e kryetarit të Kushtetueses
Kujtojmë se, kryetari i Gjykatës Kushtetuese zgjidhet me votim të fshehtë, me shumicën e votave të të gjithë gjyqtarëve të Gjykatës Kushtuese, për një periudhë 3-vjeçare me të drejtë rizgjedhjeje vetëm një herë. Seanca për zgjedhjen e Kryetarit drejtohet nga gjyqtari më i vjetër në detyrë. Në rast se ka më shumë se një kandidat dhe gjatë votimit asnjëri prej tyre nuk merr shumicën e parashikuar të votave, bëhet një votim i ri dhe, pas këtij, vijohet me votimin mes kandidatëve që kanë marrë numrin më të madh të votave. Në përfundim të këtij votimi shpallet i zgjedhur kandidati që ka marrë shumicën e votave. Në rast se asnjë nga kandidatët nuk ka marrë shumicën e votave ose votat janë ndarë në mënyrë të barabartë, Kryetari caktohet me short. Procedura e zhvillimit të shortit parashikohet me vendim të Mbledhjes së Gjyqtarëve. Kryetari i zgjedhur njofton Presidentin e Republikës dhe Kryetarin e Kuvendit.
Kim takoi anëtarët e Gjykatës Kushtetuese
Ndërkohë ambasadorja e SHBA-së në Shqipëri, Yuri Kim ka zhvilluar javën që shkoi një takim në Gjykatën Kushtetuese. Pas takimit, ambasadorja Yuri Kim ka reaguar përmes një postimi në rrjetet sociale ku ka përgëzuar plotësimin me 9 gjyqtarë të Gjykatës Kushtetuese. Këtë, ambasadorja Yuri Kim e quan një arritje të madhe për reformën në drejtësi që mbështetet fuqishëm nga SHBA. Shefja e diplomacisë amerikane në Shqipëri iu ka uruar anëtarëve të Kushtetuese sukses në zgjedhjen e një shefi të ri dhe në dhënien e drejtësisë me pavarësi dhe integritet, në përputhje me ligjin. “Që nga Dhjetori 2022, Gjykata Kushtetuese e Shqipërisë është kompletuar me 9 gjyqtarë. Arritje e madhe për reformën në drejtësi, e cila mbështetet fuqishëm nga SHBA. Një nder të takoj të gjithë gjyqtarët sot për të uruar sukses në zgjedhjen e një shefi të ri dhe në dhënien e drejtësisë me pavarësi dhe integritet, në përputhje me ligjin”, ka shkruar ambasadorja e SHBA, Yuri Kim. Më herët ambasadorja e Shteteve të Bashkuara të Amerikës në Tiranë, Yuri Kim foli në një intervistë televizive për, për reformën në drejtësi. Ambasadorja Kim tha se, reforma në drejtësi nuk është e lehtë, apo e përsosur, por po shohim rezultate dhe po ndërtohet. Ajo vijoi më tej duke thënë se reforma në drejtësi ka mbështetjen e fortë, absolute të Shteteve të Bashkuara, si dhe atë të Bashkimit Europian.