Nuk ndalet Kokalari, pas Berishës sulmon një tjetër mbështetëse të tij: E ka mbaruar Fakultetin e Juridikut me korrespondencë para 2 vitesh, nuk më tremb asnjë nga ju

Evi Kokalari ka sulmuar një tjetër mbështetëse të Sali Berishës. Bëhet fjalë për Adriana Kalajën, për të cilën thotë se e ka mbaruar Fakultetin e Juridikut me korrespondencë para 2 vitesh.

“Kjo është Kryetarja e Komisionit te Apelimit, që dhe juridikun e mbaroi me korrespondence dy vjet më parë. Klasi i saj, paraqitja fizike dhe profesionale janë fytyra e re e Partisë Demokratike.

Tashti, shkoni apeloni po deshët. Ndërkohë doja ti tërhiqja vëmendjen Albana Vokshit për punën e shkëlqyer që po bën me gratë e Partisë”, shkruan Kokalari në rrjetet sociale.

Kjo erdhi pas një reagimi që bëri Kalaja në rrjete sociale duke shkruar: “Më vjen çudi se ata që kritikojnë garën dhe na bëjnë moral, i janë përvjedhur gjithmonë asaj. Çdo gjë në jetë e kanë fituar dhuratë nga prindërit, bashkëshortet dhe dash*orët.”

Vetëm se iu kundërvu Berishës, Kokalari supozon se do i vihen të gjithë kundër por i paralajmëron se nuk trembet nga askush dhe asgjë.

“Tashti do lançojnë ndaj meje të gjithë skuthat dhe qeniet më të shëmtuara që mban shoqëria Shqiptare. Bujrum!!

Por mos harroni që jam vajzë Kokalarësh dhe asnjë nga ju nuk më tremb. Këto ditë më është kujtuar shpesh Musine Kokalari, që e vetme qëndronte perpara injorancës komuniste që e sulmonin dhe pastaj për 45 vjet hëngrën bar”, shkroi Kokalari.