Studiuesja Shamku kundër anëtarit të Akademisë së Shkencave Sinani: Leksiku nuk njehsohet, lexo Caruanan, s’keni nivelin minimal shkencor për të hartuar fjalorë

3 projektet për hartimin e Fjalorit të Madh të Gjuhës Shqipe, Fjalorit të Historisë së Shqipërisë dhe Enciklopedisë Shqiptare ka shkaktuar reagimin e ashpër të studiueses dhe gjuhëtares Ledi Shamku. Ajo reagoi ashpër ndaj anëtarit të Akademisë së Shkencave, Shaban Sinanit, i cili u paraqit dje në Komisionin e Edukimit dhe Mediat, ku prezantoi 3 projektet e mëdha të Akademisë së Shkencave. Sinani tha se "Fjalori i Madh i Gjuhës Shqipe” do të zgjidhë problemin e njësimin e leksikut të gjuhës tonë. Sipas Shamkut, kjo është një gafë e madhe, pasi leksiku i një gjuhe nuk mund të njehsohet, por është i hapur. Në fjalën e tij në komision, Sinani u shpreh se nuk ka një Fjalor të Madh Gjuhës Shqipe. “Në lidhje me fjalorin e madh, nuk më vjen mirë që ta them, por gjuha shqipe është e vetmja që nuk ka ende një fjalor të madh. Nga 600-1000 veta do angazhohen për të përuruar trashëgiminë. Do të jetë AMZA për popullin shqiptar. Pra, jemi të detyruar që të kemi fjalorin për të komunikuar sinkronikisht, pavarësisht se ku gjenden shqipfolësit”, deklaroi akademiku Sinani. Shamku ironizoi Sinanin duke i kujtuar plagjiaturën në fjalimin e kryetarit të ASH, Skënder Gjinushi në nëntor të vitit të kaluar ku e konsideroi Manuel Zrinzo Caruana një antropolog të njohur, bazuar në një shkrim sarkastik. Shamku shtoi se Akademia e Kosovës e ka cilësuar grupin e punës për këtë 3 projekte si pa nivelin e duhur shkencor. Gjithashtu, ajo akuzoi Shaban Sinanin për dezinformim në Komisionin e Edukimit dhe Medias lidhur me   "Pa më thuaj pak, Shaban, si do ta njësosh leksikun? Edhe Kostallari vetë, o Shaban, kur e vrojtonte Enveri me Mehmetin nga lozha, tha se leksiku është i hapur (pra nuk njësohet), ndërsa sintaksa disi më pak e hapur, e kështu me radhë. Po mirë, ju tha Akademia e Kosovës kur ju refuzoi për këtë palofjalor: ‘Nuk keni as minimumin e kërkuar të nivelit shkencor për ta bërë këtë punë’. Caruanan lexoje edhe njëherë, Shaban, se ndoshta edhe ai, madje ay, do të të thotë: ‘Boboo, ç’thua kështu o njeri letrash?!’ Nuk është as etike e as ligjore ta dezinformosh Parlamentin, se dezinformimi ka përgjegjësi. The se nuk kemi një Histori të Përditësuar të Shqiptarëve. Bjeri njëherë derës së Akademisë së Studimeve Albanologjike, se e ke aty të botuar një vepër fort të lëvdueshme plot 5 vëllime”, iu drejtua studiuesja e njohur Shamku akademikut Sinani në rrjetet sociale.