Zaptuan foltoren dhe bllokuan seancën plenare, Berisha dhe 4 deputetë të “Rithemelimit” përjashtohen për 10 ditë nga Kuvendi, Gjekmarkaj “thumbon” Alibeajn për nismën e shkarkimit të Nikollës

5 deputetë demokratë të Grupit të Rithemelimit në PD përjashtohen për 10 ditë nga Parlamenti dhe komisionet parlamnetarë, pasi bllokuan punimet e Kuvendit ditën e enjte. Ish-kryeministri Sali Berisha dhe deputetët e tjerë të “Foltores” Flamur Noka, Belind Këlliçi, Edmond Spaho dhe Edi Paloka u ndëshkuan dje nga Sekretariati për Etikën, Votimet dhe Procedurat në Kuvend. Përjashtimi i tyre erdhi pas kërkesës të 7 deputetëve të PS: Ismet Beqiraj, Petro Koçi, Arben Pëllumbi, Ermonela Felaj, Mimi Kodheli, Denis Deliu dhe Gerta Duraku, që cilësuan të pahijshme dhe jo etike zaptimin e foltores së parlamentit, krijimin e kaosit dhe bllokimin e punimeve të Kuvendit nga 5 deputetët demokratë. Pas përjashtimit nga seanca e djeshme, Kryesia e Kuvendit vendosi një masë akoma më penalizuese ndaj Berishës, Palokës, Këlliçit, Spahos dhe Nokës. Ky vendim erdhi pasi të enjten PS nuk pranoi ndryshimin e rendit të ditës në Kuvend për të thirrur në interpelancë kryeministrin Edi Rama, për të dhënë shpjegime lidhur me skandalin e ish-agjentit të FBI të arrestuar, Charles McGonigal, i cili akuzohet se ka marrë ryshfet 225 mijë dollarë nga Rama për të lobuar kundër PD. Në këtë situatë, demokratët e Berishës bllokuan punimet duke detyruar kryetaren e Parlamentit, Lindita Nikolla të mbyllë seancën pas 1 ore.

Kërkesa e 7 deputetëve të PS

“Në seancën plenarë të datës 26.01.2023, pesë deputetë të opozitës, Sali Berisha, Flamur Noka, Belind Këlliçi, Edmond Spaho dhe Edi Paloka u sollën në mënyrë të pahijshme dhe jo etike, duke penguar zhvillimin e rregullt të seancës plenarë dhe duke shkaktuar kaos në seancë. Konkretisht këta pesë deputetë, zaptuan foltoren dhe penguan zhvillimin normal të seancës plenare, duke bërë të pamundur që deputetët të merrnin fjalën, siç ishte parashikuar në rendin e ditës. Edhe pas tërheqjes së vëmendjes dhe dhënies së vërejtjes nga drejtuesja e seancës, deputetët e sipërcituar vazhduan të pengonin zhvillimin e rregullt të seancës plenare, duke mbajtur të zaptuar foltoren. Gjithashtu, drejtuesja e seancës u detyrua të merrte edhe masën disiplinore‘Për përjashtimin nga seanca plenare’ ndaj tyre, por pavarësisht kësaj, këta deputetë nuk pranuan të dalin nga salla’. Bazuar në Rregulloren e Kuvendit, neni 63, pika 1, gërma ‘ç’ dhe neni 65/1, pika, gërma ‘a’, kërkojmë marrjen e masës disiplinore ‘Përjashtim nga pjesëmarrja në komisione dhe në seancë plenare deri në 10 ditë’ ndaj këtyre deputetëve”, thuhet në kërkesën e 7 deputetëve socialistë”, shkruhet në kërkesën e 7 deputetëve të PS drejtuar Sekretariatit për Etikën, Votimet dhe Procedurat në Kuvend.

Gjekmarkaj: Më mirë të shkarkonim Ramën në vend të Nikollës po të kishim votat

Deputeti demokrat dhe n/kryetari i Kuvendit, Agron Gjekmarkaj la të kuptohet se iniciativa e grupit parlamentar të PD për nisjen e procedurës së shkarkimit të Lindita Nikollës për keqpërdorim të detyrës dhe dëmtim të parlamentarizmit, duke u kthyer të enjten në “mburojë” të Edi Ramës, është në fakt iniciativë vetëm e kreut të deputetëve të PD, Enkelejd Alibeaj. Sipas Gjekmarkajt, Alibeaj nuk e ka konsultuar këtë nismë me deputetët e tjerë demokratë. Në rrjetet sociale, Gjekmarkaj komentoi duke thumbuar Alibeajn se shkarkimi i Nikollës është i pavlerë pasi nëse opozita do të gjente votat më mirë të shkarkonte kryeministrin Edi Rama. Gjekmarkaj shkoi më tej duke akuzuar Alibeajn se po tërheq vëmendjen e opinionit publik nga skandali “McGonigal” dhe po bën favor ndonjë elementi të brendshëm në PS kundër kryetares së Kuvendit. “Nisma individuale për shkarkimin e zonjës Nikolla është e pakonsultuar me grupin e PD. Kjo bëhet për të spostuar vëmendjen në renditjen e temave politike dhe për ndonjë qokë brenda në PS. Nëse ne do kishim votat për të hequr Nikollën, nuk ‘shtiem’ në ajër, prandaj më mirë shkarkojmë Ramën dhe e mbyllim çështjen e pushtetit. Kësisoj i kursejmë vendit edhe revolucionin!”, komentoi Gjekmarkaj.