Suzy George, Shefe e Kabinetit të Departamentit të Shtetit të SHBA, ka vizituar Shëngjinin, ku është takuar me afganët në pritje të zhvendosjes së përhershme në Shtetet e Bashkuara. Kështu bën të ditur ambasada amerikane në Tiranë në një njoftim në rrjetet sociale, ku shprehu mirënjohjen e pamasë për shqiptarët dhe mikpritjen e tyre, e famshme në të gjithë botën. “Bashkë me Rena Bitter, Ndihmëse Sekretare për Çështjet Konsullore dhe Mara Tekach, Koordinatore mbi Përpjekjet për Zhvendosjen e Afganëve (CARE), George u takua gjithashtu me stafin e përkushtuar që ofron ndihmë të çmuar për komunitetin afgan gjatë qëndrimit të tyre në Shqipëri. George shprehu mirënjohjen e saj të pamasë për shqiptarët dhe mikpritjen e tyre të famshme në të gjithë botën”, njoftoi dje ambasada e SHBA. Kujtojmë se Shqipëria ka pritur mbi 4500 afganë që prej vitit 2021, me vetëm një komunitet të vogël ende në proces.