Një masakër e mundshme është parandaluar në Athinë. Autoritetet greke kanë mundur të shkatërrojnë një rrjet terroristësh që po përgatisdnin sulme ndaj objekteve hebreje.
Sipas mediave greke, në pranga janë vendosur dy pakistanezë që ishin pjesë e një rrjeti më të gjerë.
Ky grup po planifikonte sulme të ngjashme edhe në Qipro. Mediat qipriote kanë raportuar se në tetor të vitit 2021, policia arrestoi një pakistanez pasi kishte dyshime se ai po planifikonte të ekzekutonte biznesmenë izraelitë në Qipro. I arrestuari dyshohet se punonte me njërin nga të arrestuarit në Greqi.
Dy të rinjtë e arrestuar 27 dhe 29 vjeç kishin si synim një restorant hebre në Athinë që funksiononte edhe si sinagogë. Deri më tani ajo që është vërtetuar edhe nga ekzaminimi dhe analiza e telefonave celularë të dy pakistanezëve është se ata vazhdonin të flisnin vazhdimisht për vrasje.
Ata iu referoheshin personave specifik me origjinë hebreje. Ky element i çon analistët në përfundimin se plani ka qenë fillimisht sulmi ndaj restorantit në Psirri dhe më pas sulmi ndaj personave të caktuar. Sipas autoriteteve, për çdo person të vrarë ato do të merrnin 15 mijë euro.