Revoltë brenda qeverisë së Beogradit, ministri serb kërkon urgjentisht sanksione ndaj Rusisë

Ministri i ekonomisë, Rade Basta, kërkon që në mënyrë urgjente, Serbia t’i vendosë sanksione ndaj Federatës Ruse për shkak të luftës së nisur në Ukrainë. “Vendi ynë tashmë po paguan një çmim të lartë për mosvendosjen e sanksioneve ndaj Rusisë dhe kjo po bëhet e papërballueshme. Unë si ministër i ekonomisë nuk mund të pranoj se sa presion po i bëhet presidentit të Serbisë, Aleksandër Vuçiç, dhe ne heshtim”, shkruan ai në një letër të hapur duke u kërkuar edhe ministrave të tjerë të shprehin hapur qëndrimin e tyre për këtë çështje. Basta shtoi se refuzimi për të sanksionuar Rusinë u bë me shpresën që konflikti të përfundonte shpejt, por thekson se tashmë realiteti është se luftës nuk I duhet fundit dhe zëri i arsyes ka mbaruar. “Vendet e vogla gjithmonë vuajnë në konfliktin e të mëdhenjve dhe për shkak të turbullirat globale, Serbia përballet me presione të tmerrshme”, paralajmëron ministri Basta. Partia e Bashkuar, pjesë e koalicionit qeverisës, është distancuar nga thirrja e deputetit të saj. Lidhur me këtë çështje, por edhe të tjera, pritet që presidenti serb, Aleksandër Vuçiç, të mbajë një fjalim gjatë të enjtes drejtuar kombit. Takimi i radhës mes liderëve të Kosovës dhe Serbisë, nën ndërmjetësim të Bashkimit Evropian do të mbahet më 18 mars në Ohër. Fokusi i bisedimeve do të jetë udhërrëfyesi për zbatimin e marrëveshjes për rrugën drejt normalizimit të marrëdhënieve ndërmjet Kosovës dhe Serbisë, për të cilën Vuçiç dhe Kurti, sipas kreut të diplomacisë evropiane, Josep Borell, ranë dakord më 27 shkurt në Bruksel.