Rusia i hedh “benzinë zjarrit”, rrëzon marrëveshjen e Ohrit për planin “franko-gjerman”: Kosova është pjesë e Serbisë

“Kosova është pjesë integrale e Serbisë”, ka qenë përgjigja e Rusisë ditën e djeshme teksa ka komentuar Marrëveshjen e Ohrit, për të cilën Kosova e Serbia ranë dakord më 18 mars. 
 “Kosova është pjesë integrale e Serbisë”, ka qenë përgjigja e Rusisë. “Këshilli i Sigurimit i OKB-së është trupi i vetëm i autorizuar për të konsideruar statusin e autonomisë së një province serbe. Asnjë vendim i ri s’është marrë. Kosova është pjesë integrale e Serbisë. Ne bashkëpunojmë ngushtë me partnerët serbë në mbrojtjen e interesave dhe të drejtave legjitime të Beogradit në strukturat multilaterale”, ka thënë të enjten zëdhënësja e Ministrisë së Punëve të Jashtme të Rusisë, Maria Zakharova për “RTBalkan”. Zakharova ka përmendur sërish Rezolutën 1244 se “ajo duhet të respektohet” dhe ka kujtuar se “ajo s’e parasheh integrimin e Prishtinës në organizata ndërkombëtare”.  Më 18 mars, Kosova dhe Serbia u dakorduan në Ohër të Maqedonisë së Veriut për aneksin e zbatimit të planit evropian, për të cilin palët u dakorduan në fund të shkurtit në Bruksel. Kujtojmë se takimi i radhës në kuadër të dialogut Kosovë-Serbi, do të zhvillohet javën e ardhshme në Bruksel, në nivel të kryenegociatorëve. Këtë e tha zëdhënësi i Bashkimit Evropian, Peter Stano, sipas të cilit, fokusi do të jetë në zbatimin e marrëveshjes për normalizim të marrëdhënieve, mbi bazë të dakordësisë së arritur në Ohër në 18 mars. Kryenegociatori i Kosovës zëvendëskryeministri, Besnik Bislimi, dhe ai i Serbisë  Petar Petkoviç pritet të diskutojnë mbi hapat e parë të zbatimit, ndërsa më vonë do të këtë takime të nivelit të lartë.