Shtëpia e Bardhë përshëndet Albin Kurtin për zgjidhjen e konfliktit dhe i kërkojnë Vuçiçit të ulë tensionet

Zëvendës këshilltari i parë i Shtëpisë së Bardhë për Siguri Kombëtare, John Finer, ka shprehur shqetësimin për ngjarjet në veri të Kosovës në një bisedë me kryeministrin e Kosovës Albin Kurti dhe presidentin serb Aleksandar Vuçiq, njoftoi Shtëpia e Bardhë të premten.

Finer foli me Kurtin të enjten dhe i bëri thirrje Kosovës që "të lejojë kryetarët e sapozgjedhur të komunave të ushtrojnë detyrat e tyre nga lokacione alternative dhe të tërheqë forcat e policisë nga ndërtesat komunale", sipas Shtëpisë së Bardhë.

Ai gjithashtu përshëndeti "gatishmërinë e Kurtit për të punuar për të krijuar kushtet për zgjedhje të reja," thuhet në deklaratë.

Një ndihmës i Biden foli me Vuçiq të premten dhe i kërkoi Serbisë që "të tërheqë forcat e saj të armatosura të stacionuara pranë kufirit dhe të ulë nivelin e tyre të vigjilencës, si dhe t'u bëjë thirrje protestuesve të qëndrojnë të qetë", thuhet në një deklaratë të Shtëpisë së Bardhë.

Në të dyja telefonatat, Finer, siç njofton Shtëpia e Bardhë, ka shprehur shqetësimin për ngjarjet në veri të Kosovës dhe ka apeluar që situata të qetësohet.

Trazirat u intensifikuan në veri të Kosovës pas zgjedhjeve në prill, të cilat u bojkotuan nga serbët etnikë dhe kandidatët shqiptarë etnikë fituan në katër komuna me shumicë serbe në veri. Shqiptarët etnikë përbëjnë 90 për qind të popullsisë së Kosovës. Në përleshjet mes protestuesve serbë dhe KFOR-it të hënën u plagosën 30 pjesëtarë të KFOR-it dhe 52 serbë.

Për shkak të dhunës, NATO njoftoi dërgimin e trupave shtesë në Kosovë.