8 ngjarje kriminale me 12 viktima, Erzen Breçani zbardh detajet për sulmin e ‘Top Channel’: Janë në rrugën e mbarë për dokumentimin e ngjarjes

8 ngjarje kriminale janë regjistruar gjatë periudhës janar-mars, të cilat kanë shkaktuar 12 viktima. Sipas ish-drejtorit të Policisë Erzen Breçani krimi i organizuar ka fituar terren dhe policia nuk po  tregon forcën e saj goditëse për të mbajtur territorin nën kontroll. Një rol të rëndësishëm sipas tij ka edhe dokumentimi i ngjarjes për të parandaluar veprime të tjera.

“Këtë tremujor është shtuar veprimtaria kriminale dhe më shqetësuese është vrasja e dy njerëzve të pafajshëm. Policia nuk po e tregon forcën e saj goditëse për të mbajtur territorin nën kontroll. Forca goditëse e policisë së shtetit është mjaft e zbehtë. Policia duhet të vlerësojë dokumentimin e ngjarjeve. Krimi i organizuar ka marrë terren. Në ngjarjen e Top Channel mendoj që janë në rrugën e mbarë për dokumentimin e ngjarjes. Çdo dokumentim i ngjarjes parandalon veprime të tjera”.

Breçani thekson se ngjarjet kriminale mund të parandalohen, duke i mbikëqyrur grupet kriminale nga policia dhe duke njoftuar çdo aktivitet kriminal.

“Ngjarjet kriminale mund të parandalohen. Grupet kriminale në vendin tonë janë të identifikuara dhe mund të parandalohen ngjarjet, duke i mbikëqyrur, duke kryer kontrolle,  duke parë lidhjet  e tyre të ndjekësh burimin e të ardhurave lokalet dhe njerëzit që frekuentojnë. Policia duhet të njoftojë çdo aktivitet kriminal”.