Çfarë ka ndodhur? Adriatik Lapaj lëshon denoncimin dhe del me reagimin e fortë: Zoti e faltë!

Aktivisti i Shoqërisë Civile dhe njëkohësisht avokati Adriatik Lapaj ka denoncuar prerjen e disa luleve zbukuruese, të quajtura bouganville, që ai vetë, bashkë me aktivistë të tjerë kanë mbjellë 4 vite më parë në qytetin e Sarandës.

Përmes një postimi në Facebook, ai thotë se pemët që i jepnin bukuri qytetit janë prerë natën, por thekson se  kjo nuk e ndal, pasi sërish do të mbjellë lule në çdo prag në zonat e Sarandës dhe Ksamilit.

Ndërsa më tej ka dhe një thirrje për Policinë e Sarandës, në lidhje me kapjen e autortëve, pasi deri më tani nuk ka bërë asnjë reagim.

Postimi i plotë i Lapajt:

ZOTI I FALTË! 4 vite më parë i mbollëm me shumë dashuri. I ujitëm çdo verë me krahë. I rimbollëm sa herë i dëmtuan. Ishin bërë të bukura shumë. Kishin filluar ta pushtonin betonin e shëmtuar. Nuk ishin më lulet tona, por pasuri e qytetit.

Ishin modeli si e mira mund të rritet me përkushtim. Iknim nga Tirana çdo muaj për t’i kujdesur. U vrisnin sytë. Vajtën i prenë. Natën kanë shkuar dhe prerë një pjesë të tyre. Në fakt nuk prenë lulet që mbolli e rriti me mundim Adriatiku, Ergysi, AguStela , Klejdi ,Fatjoni , Saimiri, Livia, Endri, Elona, Hyqmeti, Arditi, Vasili, Aina e të tjerë miq, por pemën ku kanë hipur edhe vetë ata që gjejnë guximin të presin lule.

Sa i dëshpëruar duhet të jesh të presësh lule?! Unë prapë do mbjell lule dhe pemë. Te unë nuk e vrasin dot njeriun…as besimin që ky vend do bëhet. Lulet tona janë pasqyra ku duket qartë shëmtia e së shkuarës që ka hedhur rrënjë.

Ne prapë do t’i mbjellim. Madje më shumë. Madje do i dhurojmë çdo banese private lule të tilla që lulet të kenë dhe Zot. Ju i pretë te rruga se shteti nuk i del Zot pronës së vetë, por nuk e prisni dot filozofinë tonë…lulet do i mbjellim në çdo prag në zonat e Sarandës dhe Ksamilit. Shkoni prijini te oborret e atyre… PËR POLICINË E SARANDËS: NDONJË REAGIM DHE KAPJE AUTORËSH? APO NUK HARXHONI KOHË ME LULET JU?