A ka pasur kontakt mes Putin dhe Trump? Reagon për herë të parë Kremlini

Nuk ka pasur asnjë komunikim midis presidentit rus Vladimir Putin dhe kandidatit për president të SHBA-së, Donald Trump, në lidhje me lirimin e një gazetari amerikan të burgosur apo ndonjë temë tjetër, tha Kremlini të enjten.

“Natyrisht, Putini nuk ka kontakte me Donald Trump”, u tha gazetarëve zëdhënësi i Kremlinit Dmitry Peskov. Ai e bëri komentin pasi Trump pretendoi në një postim në mediat sociale se pasi të fitojë përsëri presidencën në nëntor, Putin do të lirojë reporterin e Wall Street Journal, Evan Gershkovich.

Gazetari “do të lirohet pothuajse menjëherë pas zgjedhjeve, por patjetër përpara se të marr detyrën”, tha Trump në Truth Social. “Ai do të jetë në shtëpi, i sigurt dhe me familjen e tij. Vladimir Putin, presidenti i Rusisë, do ta bëjë këtë për mua, por jo për askënd tjetër dhe ne nuk do të paguajmë asgjë”, u shpreh ai.

Peskov hodhi poshtë deklaratën e Trump, duke thënë se çdo komunikim me zyrtarët amerikanë në lidhje me lirimin e mundshëm të amerikanëve të akuzuar për krime në Rusi do të bëhej në fshehtësi të plotë.

“Mund të theksojmë edhe një herë atë që kemi thënë vazhdimisht se këto bisedime duhet të zhvillohen në heshtje të plotë dhe në mënyrë absolutisht të fshehtë. Kjo është mënyra e vetme për t’i bërë ato efektive”, tha ai.

Gershkovich, një shtetas amerikan, u arrestua nga Shërbimi Federal i Sigurisë së Rusisë (FSB) me akuza për spiunazh në mars 2023. Ai u akuzua për mbledhjen e sekreteve shtetërore në lidhje me një ndërmarrje ushtarako-industriale në Ekaterinburg. Një gjykatë ruse i ka zgjatur disa herë paraburgimin teksa ai pret gjykimin.