Mediat raportuan ditën e sotme se ish-zëvendëskryeministri Arben Ahmetaj po hetohet zyrtarisht nga Prokuroria e Posaçme për tri akuza, shpërdorim detyre, korrupsion dhe pastrim parash.
Por ndonëse bëri zhurmë në media, ky nuk është lajm i ri, pasi SPAK i ka konfirmuar hetimet që në muajin nëntor të vitit të kaluar.
Për këtë arsye, ekspertja e ekonomisë, Brisida Shehaj, e ka parë me dyshim raportimin e mediave.
Shehaj tha në një intervistë me Sonila Meçon lajmi për Ahmetajn kishte si qëllim zhvendosjen e vëmendjes nga raporti i djeshëm i Departamentit Amerikan të Shtetit, i cili përmendte pagesat që mediat kanë marrë nga kompanitë e inceneratorëve në dhjetor 2021dhe janar 2022.
“Sot u desh një lajm për të çorientuar lajmin e DASH. Sot u desh një lajm për të thënë që ne kemi bërë punën, ndërkohë kemi tri vite që publikojmë fakte, që kemi rrezikuar jetën. Janë gazetarë investigativë ndërkombëtarë, të cilët kanë kërkuar, po hetojnë, kanë hetuar, kanë bashkëpunuar, bashkëpunojnë, kërkojnë bashkëpunimin tonë, kërkon e gjithë bota, vetëm ne nuk e kërkojmë. DASH arriti dhe i vuri dhe një shifër, 271 milionë dollarë. Në opinionin tim, flas si eksperte janë shumë më shumë se kaq. Kjo pjesa për mua nuk bën lajm”, theksoi ajo.