Edi Rama sinjale të papritura për largim nga qeverisja, kryeministri heq dorë nga qëndrimi në pushtet deri në 2030, kush ia preu hovin?

Kryeministri Edi Rama ka dhënë kohët e fundit sinjale të papritura se në zgjedhjet e 2025 mund të tërhiqet nga politika. Edhe pse ai para disa kohësh theksonte dhe fliste për një tjetër mandat, pra do ta mbyllte qeverisjen e tij në 2029, duket sikur ka një ndryshim kursi. Kryeministri dilte nëpër takime me njerëz dhe jepte parashikime për jetëgjatësinë e tij të qëndrimit në pushtet, duke e thënë troç se ai do jetë në drejtimin e vendit të paktën edhe për 7 vitet e ardhshme. Rikujtojmë gjithashtu se në zgjedhjet e fundit të vitit 2021, Rama shpalosi për herë të parë vizionin për qeverisjen në Shqipëri.  Ai u shfaq i sigurt në fitoren e Partisë Socialiste jo vetëm në këto zgjedhje por edhe për 10 vite të tjera. “Nuk kemi akoma 8 vite në qeveri, se kemi filluar në fillim të shtatorit të 2013. Ditët, javët dhe vitet tona janë mbushur me punë dhe kur të bëhen 8 do kemi bërë më shumë punë. Programi ynë është i ditur publikisht.

Ne kemi vendosur shtyllat, dhe vazhdojmë të punojmë. Ne do bëjmë publike një platformë me një program pune. Do jetë një vizion pune për Shqipërinë deri në vitin 2030. Që të jeni të qartë deri në 2030 do jetë PS në pushtet”, tha Rama në vitin 2021. Por mesa duket kryeministri ka hequr dorë nga qëndrimi në pushtet deri në 2030. Reagimi i fundit i Ramës për largim të parakohshëm nga politika ishte më 13 nëntor. “Jemi i vetmi vend në këtë lagjen tonë në Ballkan që kemi zero taksa për biznesin e vogël dhe ku qeveria është aleati strategjik i çdo njeriu që hap derën e një biznesi të vogël. Sepse nuk i kërkon asnjë taksë apo TVSH,. Taksa do të jetë zero deri në vitin 2029, jam apo nuk jam unë. Nëse nuk do jem unë, e vetmja arsye që mund të më rikthejë këtu tek ju t’ju them “çohuni t’i rrëzojmë këta (PS) është po prekën taksën e biznesit të vogël”, tha Rama.

Largimi i afërt i Ramës

Po ashtu dhe pak javë më parë ai ka dhënë mesazhe se jeta e tij në politikë nuk do të jetë e gjatë. Për herë të parë gjithashtu kreu i qeverisë ka zbuluar se nuk e ka marrë ende vendimin nëse do të kërkojë një mandat të katërt si Kryeministër i Shqipërisë. “Kurrë nuk kam menduar për mandatin e radhës, mendoj vetëm për atë që duhet të bëj në mandatin aktual. Nuk i marr këto vendime paraprakisht, sepse jeta më ka mësuar, herë me të keq e herë me zemërgjerësi, që është më mirë të kesh një vizion dhe destinacion, por të planifikosh dhe të punosh hap pas hapi. Nuk i dihet kurrë me këto gjëra që po ndodhin. Por edhe pa ndodhur diçka, sërish nuk i dihet,” është shprehur Rama në podcastin e krijuar nga vetë ai.  Gjithashtu edhe në fillim të majit të këtij viti, Rama dha sinjale se largimi i tij do të jetë shumë afër, pasi kreu i qeverisë tha se fushata për zgjedhjet e 14 majit nuk ishte një parapërgatitje e tij për një mandat të katërt.

Kush ia preu hovin?

Pse ky ndryshim kursi i papritur i Ramës? Mos vallë kryeministri mund të japë dorëheqjen si kryeministër? Bashkëpunëtorët e tij më të rëndësishëm prej vitesh në Partinë Socialiste po bien një nga një në qeli. Rama është i vetmi kryeministër që drejton vendin me dy qeveri. Njëra brenda burgut dhe tjetra nëpër institucione. Në javët e fundit, SPAK ka çuar emra të njohur nga PS në qeli. Madje afera e inceneratorëve që fundosi aleatin e tij Arben Ahmetaj, një nga funksionarët më të lartë tek socialistët rrezikon dhe emrin e tij. Jo vetëm kaq, dosja McGonigal që mban emrin e tij vazhdon të hetohet. SHBA nuk e fal ndërhyrjen në punët e saj, për më tepër që u korruptua një zyrtar i FBI. Ndonëse kryeministri u distancua, dosja është shumë voluminoze dhe ka shumë çështje të pazbardhura. Për më tepër, gjatë vizitës së tij në SHBA, Kongresi ka kërkuar hapjen e dosjes. Gjithashtu në SPAK shumë ministra socialistë kanë dosje nën hetim.

Siç e kemi parë këto kohë, drejtësia e re në patronazh nga amerikanët nuk pyet për emra. Frida Krifca, Damian Gjiknuri, Ilir Beqaj, Olta Xhaçka, Ogerta Manastirliu, Niko Peleshi apo dhe Belinda Balluku i kanë punët keq me drejtësinë. Dosjet e abuzimeve me fondet e BE, tenderat, korrupsioni në shëndetësi, inceneratorët, po ziejnë në SPAK. Është çështje ditësh, apo javësh që Prokuroria e Posaçme të presë fletë-arrestet. Jo vetëm kaq, por Rama është nën rrethin e kuq amerikan dhe për bashkëpunimin me “non gratat”. Dalja e fundit e skandalit me oligarkët që financojnë Sali Berishën dhe familjarët e tij me projektet që firmos qeveria ka shtuar cunamin amerikan ndaj Ramës.  

SHBA i ka vendosur “bllokadë” totale kryeministrit. Para pak javësh Rama kur drejtoi Këshillin e Sigurimit në OKB nuk u përfill nga askush. Sekretari amerikan i Shetit, Antony Blinken as nuk ia hodhi sytë dhe as nuk tentoi t’i zgjaste dorën. Ndryshe nga Rama, Bajram Begaj, por edhe Vjosa Osmani u takuan me presidentin Biden, zyrtarin e DASH Gabriel Escobar dhe me Zv. Presidentin e Komisionit Evropian, Josep Borrell apo presidentin e Zvicrës. Duket sikur amerikanët e bojkotuan “liderin global”. Nëse Rama nuk ka mbështetjen amerikane, ëndrra e tij për të qeverisur deri në 2030 është prerë në mes. Mbetet të shohim se çfarë do të ndodhë në javët në vijim, por zhvillimet tregojnë se pritet një “tërmet” i madh në politikën shqiptare.