Vlora Hyseni pasuese e Bendos në krye të SHISH, reagon ashpër Spartak Braho: Rama sharlatan dhe aventurier, ja pse presidenti nuk duhet ta firmose këtë propozim

Propozimi që kryeministri Edi Rama i bëri presidentit Bajram Begaj për të emëruar në krye të Shërbimit Informativ Shtetëror, Vlora Hysenin, e cila është shkarkuar më herët nga Kurti në Kosovë nga detyra e zëvendësdrejtoreshës së Agjencisë së Kosovës për Inteligjencë, ka sjellë dje reagime të forta të politikës. Njëri prej tyre që ka reaguar ashpër ka qenë ish-kreu i Komisionit të Sigurisë Kombëtare dhe ish-deputeti i Partisë Socialiste, Spartak Braho. Ky i fundit gjatë një prononcimi të shkurtër për gazetën “SOT”, akuzoi kryeministrin Edi Rama se më këtë veprim tregoi se është sharlatan dhe aventurier, ndërsa u shpreh se e ka kthyer Kushtetutën në letër Bakalli”. Në këtë kontekst, zoti Braho i bëri thirrje presidentit Begaj që të mos e dekorojë emrin e Vlora Hysenit si pasuese të Helidon Bendo në krye të SHISH.  “I nderuar, po ndjek lajmet dhe dëgjoj se Rama ka propozuar tek Presidenti, drejtore të Shërbimit Informativ Shtetëror një kosovare që paska qenë zëvendësdrejtoreshë e Agjencisë së Kosovës për Inteligjencë (AKI). Ky është çmendur fare se ligji jonë i SHISH nuk e lejon që drejtues i këtij organi të jetë shtetas i huaj. Në asnjë mënyrë, qoftë edhe kosovar. A është nga rradakja mire ky. Kreu i Shërbimit Sekret shqiptar në asnjë mënyrë nuk duhet të jetë shtetas i huaj, qoftë edhe me origjinë shqiptare. Ky s’pjerdh as për Kushtetutën. Ky është opinioni im zyrtar si ish-kryetar i Komisionit Parlamentar të Sigurisë Kombëtare. Presidenti Bajram Begaj nuk duhet ta firmosë këtë propozim. Edi Rama është sharlatan dhe aventurier”, deklaroi Braho për gazetën “SOT”.