Çfarë ndodhi? Bllokohet Rruga e Arbrit, varg kilometrik automjetesh

 Dhjetëra automjete kanë mbetur në trafik pasditen e sotme, në Rrugën e Arbërit. Mësohet se trafiku është shkaktuar pasi një automjet tip furgon nuk ka arritur të ngjisë by passin duke bërë kështu edhe bllokimin e mjeteve të tjera.

Raportohet se rruga ka rreth 40 minuta e bllokuar dhe deri më tani asnjë patrullë policie nuk ka shkuar në vendngjarje. Dyshohet se kamioni është bllokuar për shkak të motit të keq me reshje shiu që pushtoi vendin këtë pasdite.

Moti i keq shkaktoi problematika edhe në Elbasan. Pak më herët u raportua se reshjet e dendura kanë krijuar vështirësi në qarkullimin e mjeteve kryesisht në aksin rrugor nga Bradasheshi që të çon në hyrje të qytetit, por edhe në drejtim të autostradës Elbasan-Tiranë. Uji ka vërshuar në rrugë, duke shkaktuar edhe vështirësi në qarkullimin e makinave.