Ukraina pa energji elektrike/ SHBA i jep lajmin e mirë Ukrainës, çfarë pritet të ndodhë në ditët në vijim

Shtetet e Bashkuara do të japin 53 milionë dollarë për të mbështetur sistemin elektrik të Ukrainës pasi ajo përballet me një breshëri sulmesh nga Rusia.

Financimi do të shkojë drejt blerjes së pajisjeve kritike të rrjetit elektrik, të cilat do të dërgohen me shpejtësi në Ukrainë në një bazë urgjente për të ndihmuar ukrainasit të përballojnë dimrin, sipas një deklarate nga Departamenti i Shtetit i SHBA.

"Kjo paketë furnizimi do të përfshijë transformatorët e shpërndarjes, ndërprerësit, shkarkuesit e mbitensionit, shkëputësit, automjetet dhe pajisjet e tjera kyçe," thuhej në deklaratë, shkruan CNN.

Financimi i shton 55 milion dollarëve ekzistues të Shteteve të Bashkuara në mbështetjen e sektorit të energjisë së urgjencës. Kjo u bë e ditur nga sekretari amerikan i shtetit Antony Blinken në një takim të G7+ të martën, i cili u zhvillua në margjinat e takimit të ministrave të jashtëm të NATO-s në Bukuresht, sipas shënimit të medias.

Zyrtarët amerikanë dhe evropianë kanë dënuar ashpër sulmet e Rusisë ndaj popullatës civile dhe infrastrukturës ukrainase, duke akuzuar Moskën se synon qëllimisht rrjetin energjetik të Ukrainës në një përpjekje për të lënë njerëzit pa energji elektrike dhe ngrohje , një akt që ata thonë se do të përbënte një krim lufte.