Andi Bushati zbërthen skemën: Si u implikua Edi Rama te skandali në SHBA

Analisti Andi Bushati thotë se nuk mund të jetë i sigurt që kryeministri Edi Rama i ka dhënë 225 mijë dollarë ish-zyrtarit të FBI-së, Charles McGonigal.

Në emisionin “Now” në Euronews Albania, Bushati u shpreh se ka një sërë rrethanash që e implikojnë në një mënyrë tepër të rëndë Ramën, pasi ky i fundit ka mbajtur takime me McGonigal që nuk janë bërë publike.

“Kush është teza ime? Unë nuk jam 100% i sigurt që Rama ia ka çuar 225 mijë dollarët zyrtarit të FBI-së, por ka një sërë rrethanash që e implikojnë në një mënyrë tepër të rëndë kryeministrin e vendit tim. Ka zhvilluar disa takime me zyrtarin e FBI-së. Pyesni çdo ministër të kësaj Republike, kur takohet me një zyrtar të lartë të këtij niveli.

Është ambasada?  Nuk ka qenë. Ka një krenari të madhe për ta shpallur në Facebook, unë takova shefin e kundërzbulimit të FBI-së, asnjë postim i Ramës. Nuk mund të takosh ti një zyrtar kaq të lartë të FBI-sëd he të mbash në zyrë dy tregtarë, pa certifikatë sigurie, pa asnjë tagër publik. Pse ky mister i takimeve të Ramës dhe këtij? Po fliste për interesat e vendit apo po sillej si një lobist dhe duhej ta mbante takimin në mister?”, theksoi ai.