Rudina Hajdari pranon takimet me Agron Nezën, zbulon se çfarë është diskutuar mes tyre

Rudina Hajdari, ish-deputetja që është ribashkuar me Partinë Demokratike ka pranuar se ka zhvilluar takime me Agron Nezën, i cili në dosjen e ish-agjentit të FBI-së Charles McGonigal, identifikohet si Personi A. e ftuar në Report TV, ajo tha se me Nezën nuk ka bërë asnjë lloj biznesi. Hajdari tha se bashkë kanë biseduar veç për kujtimet që Neza ka pasur me babain e saj, të ndjerin Azem Hajdari.

“Rama me skandalin Mc Gonigal duhet të mbajë përgjegjësi. Gazetat më prestigjoze të botës kanë dhënë mjaftueshëm informacione për të hapur një çështje hetimi këtu.  Rama ka gjetur një gjë të parregullt te Basha, një pagesë të parregullt që nuk ka treguar burimin dhe këtë e ka përdorur për të shantazhuar Bashën, kjo është skema. Basha  ia dhuroi Ramës të gjitha pushtetet dhe nuk erdhi si dëshirë, por si shantazh.  Nuk e kam takuar kurrë McGonigal dhe s’kam pasur punë me Nezën përveç se për të diskutuar për kujtimet që ai kishte me babain tim,”- tha Hajdari.

Ç'ka ndodhur me ish-agjentin?

Mbi një javë më parë, FBI arrestoi ish-zyrtarin e lartë të kësaj strukture, Charles McGonigal. McGonigal ka zhvilluar takime të njëpasnjëshme me kryeministrin Edi Rama dhe dy persona që në dosje emërtohen si ‘Personi A’ dhe ‘Personi B’, që janë përkatësisht Agron Nezaj e Dorian Duçka, të dy të lidhur me qeverinë shqiptare. Nezaj del në dosje si njeriu që i jep 225 mijë dollarë McGonigal në mënyrë që të ndërhyjë në FBI që të nisë hetimin për personin që po lobonte në SHBA për PD-në, në vitin 2017 kur drejtohej nga Lulzim Basha. Supozohet që bëhet fjalë për Nicolas (Nick) Muzin. Ndërsa Duçka del si njeriu që e shoqëron kudo ish-agjentin, paguan fluturimet e akomodimet e tij, si dhe i përcjell informacionet e nevojshme që do t’i shërbenin në nisjen e hetimit nga FBI. Rama mohon të ketë lidhje me akuzat e ngritura nga McGonigal. Pas publikimit të dosjes, Partia Demokratika ka organizuar një protestë që do mbahet më 11 shkurt para Kryeministrisë, e do të kërkojë largimin e Edi Ramës nga posti i kryeministrit.