Nga Kroacia me destinacion Turqinë, ‘ngecja’ në derdhjen e Semanit iu ndërpret aventurën 3 shtetasve të huaj, policia merr vendimin për...

Një alarm me flamur të kuq në detin e Vlorës nga disa shtetas të huaj, menjëherë është vënë në dijeni policia kufitare duke iu ardhur në ndihmë pasi kishin ngecur ne det si pasojë e defektit që kishte pësuar anija e tyre.

Mbrëmjen e djeshme, salla operative e Policisë Kufitare Vlorë ka marrë njoftim për 3 shtetas që ishin duke lundruar në det, përballë derdhjes së lumit Seman, me një mjet veliere me të cilën ishin nisur nga Kroacia dhe e kishin të pamundur të vazhdonin lundrimin e tyre në drejtim të Turqisë ku kishin dhe destinacionin, pasi mjeti lundrues kishte pësuar defekt.

Menjëherë pas marrjes së njoftimit janë organizuar shërbimet e Policisë Kufitare, për t’iu ardhur në ndihmë 3 shtetasve të huaj.

Shërbimet e Policisë i kanë shoqëruar me mjetin e Policisë Kufitare drejt Stacionit Kufitar të Triportit. Të tre shtetasit aktualisht janë në gjendje të mirë shëndetësore.

Policia e Kufitare e Vlorës është e angazhuar maksimalisht në shërbim të qytetarëve dhe të vizitorëve, për të krijuar një ambient sa më të sigurt.