Pa rrip sigurimi dhe me celular në dorë, pezullohet nga detyra efektivi i policisë që shpëtoi shoferin nga gjoba

Një efektiv policie me iniciale I.Ç. është pezulluar nga detyra pasi nuk ka gjobitur një drejtues automjeti i cili po lëvizte pa rrip sigurimi dhe me celular në dorë.

Ky drejtues automjeti e ka postuar videon në rrjetet sociale. Tashmë ndaj efektivit të policisë ka nisur edhe një hetim disiplinor për shkelje të rëndë.

Pas publikimit në rrjetet sociale, të një videoje në të cilën shfaqet një drejtues mjeti i cili përdorte celularin gjatë drejtimit të automjetit dhe pa vendosur rripin e sigurimit, ndërkohë që punonjësi i Policisë e konstatoi por nuk i vendosi masë administrative në përmbushje të detyrave funksionale, Drejtori i Drejtorisë Vendore të Policisë Fier ka pezulluar menjëherë nga detyra inspektor I. Ç., me detyrë punonjës i Patrullës së Përgjithshme të Komisariatit të Policisë Lushnjë.

Njëkohësisht, Drejtoria e Standardeve Profesionale në Drejtorinë e Përgjithshme të Policisë së Shtetit ka nisur ecurinë disiplinore ndaj punonjësit të Policisë, për shkelje të rëndë.

Drejtoria Vendore e Policisë Fier falënderon mediat dhe qytetarët që denoncojnë raste të abuzimit me detyrën të punonjësve të Policisë duke i garantuar për reagim të menjëhershëm.