Moska futi Zelenskyn në listën e të kërkuarve, reagon ashpër Kievi

Kievi i është përgjigjur raporteve të mëparshme se Rusia e ka vendosur Volodymyr Zelensky në listën e të kërkuarve.

Ministria e Jashtme e Ukrainës tha se ajo demonstroi “dëshpërimin e makinerisë shtetërore ruse dhe propagandës, të cilat janë në humbje për atë që të shpikë tjetër për të tërhequr vëmendjen”.

Më tej në deklaratë thugeh se: “Dëshirojmë t’i kujtojmë të gjithëve se, ndryshe nga njoftimet e pavlera ruse, urdhri i Gjykatës Penale Ndërkombëtare për arrestimin e diktatorit rus Vladimir Putin me akuza për krime lufte është real dhe i zbatueshëm në 123 vende.”

Kujtojmë se Zelensky kërkohet për akuza penale, por nuk saktësohet se për çfarë akuzash bëhet fjalë. Për më tepër, nuk dihet se kur është futur emri i Zelenskyt në listë.

Ish-presidenti ukrainas, Petro Poroshenko, po ashtu është futur në listën e personave që Rusia i kërkon.

Edhe në të kaluarën, autoritetet ruse kanë vendosur emrat e zyrtarëve dhe politikanëve ukrainas në listën e personave të kërkuar. Dhjetorin e vitit të kaluar, Ministria e Brendshme e Rusisë vendosi kreun e Drejtorisë Kryesore të Inteligjencës të Ministrisë së Mbrojtjes të Ukrainës, gjenerallejtënant Kirill Budanov, në listën e personave të kërkuar.

Pranverën e kaluar, një gjykatë në Moskë ngriti aktakuza në mungesë ndaj tij për krijimin e një komuniteti terrorist, për kryerjen e një sulmi terrorist nga një grup personash dhe për posedim të armëve dhe mjeteve plasëse.

Më 3 maj, mediat ruse raportuan se në listën e personave të kërkuar të Rusisë ishin shtuar se sekretari për Siguri Kombëtare dhe i Këshillit të Mbrojtjes të Ukrainës, Aleksandr Litvinenko, ish-ministri ukrainas i Financave, Aleksandr Shlapak, dhe ish-kreu i Bankës Qendrore të Ukrainës, Stepan Kubiv.