Filmat e regjisorëve Kushtrim Beketshi dhe Luan Kryeziu në “Dea Open Air”

Dy nga filmat e edicionit të 11-të të festivalit “Dea Open Air” u shfaqën në COD. Në Cine KO Program për të pranishmit u shfaqën filmat e regjisorëve Kushtrim Bekteshi dhe Luan Kryeziu. Qendra për Hapje dhe Dialog-COD shprehet në bashkëpunim me regjisorin Edmond Topi, mirëpriti për dy mbrëmje filmat e festivalit ndërkombëtar “Dea Film Festival”. Filmi "Pranverë e paharruar" (2019) i regjisorit Kushtrim Bekteshi sjell për publikun jetën e qetë të një fshati "të harruar", që ndryshon dramatikisht kur tri prostituta arrijnë në lokalin e fshatit, duke krijuar kaos në të gjithë fshatin. Burrat, edhe përkundër përpjekjeve të grave të tyre për t’i ndaluar, tërë kohën e kalojnë në kafene, duke harxhuar paratë e fundit në alkool dhe seks. Në fund, gratë çohen në kryengritje. Si pasojë, kafeneja digjet, ndërsa jeta në fshat duket se do të kthehet përsëri në normalitet. Filmi "Heroi" (2015) nga regjisori Luan Kryeziu flet për historinë e një heroi lufte dhe përballjet e tij të pasluftës në Kosovën e re; rrethanat sociale që e shoqërojnë, si dhe ndikimin politik dhe ekonomik në ndryshimin e karakterit kryesor, i cili kishte virtytet parimore. Dashuria, sinqeriteti e ndershmëria gjunjëzohen nga problemet ekonomike, të cilat ndikojnë në ndryshimin e sjelljeve të individëve, të familjes dhe të shoqërisë. Festivali ndërkombëtar i filmit “Dea Open Air” këtë vit u zhvillua me pjesëmarrjen e 39 filmave nga 25 vende të botës. Filmat e paraqitur dhe autorët që morën pjesë në konkurrim këtë vit i janë nënshtruar fillimisht seleksionimit paraprak të komisioneve ndërkombëtare, të mbyllur në fund të muajit mars.