Kërkime arkeologjike në kuadër të projektit “Kontekstualizimi i Neolitit në fushën e Korçës”

Gjatë muajit tetor, Instituti i Arkeologjisë në bashkëpunim me Universitetin e Këlnit (Gjermani) dhe Universitetin e Nju Jorkut në Buffalo (SHBA), ndërmorën kërkime arkeologjike në kuadër të projektit “Kontekstualizimi i Neolitit në fushën e Korçës”, nën drejtimin e dr. Edlira Andoni, dr. Jana Anvari dhe dr. Patrick Willet. Akademia e Studimeve Albanologjike pjesë e së cilës është dhe Instituti i Arkeologjisë shprehet se nëpërmjet vëzhgimeve sipërfaqësore dhe studimit gjeofizik, ky projekt synon të përcaktojë madhësinë dhe strukturat e vendbanimeve neolitike në fushën e Korçës, si dhe raportin që kanë këto vendbanime me peizazhin. “Vëzhgimi sipërfaqësor (survej) i hapësirës së vendbanimeve neolitike i parapriu studimit gjeofizik me qëllim përcaktimin e vendndodhjeve të vendbanimeve neolitike. Nëpërmjet studimit gjeomagnetik  synojmë të përcaktojmë veçoritë kryesore arkitekturore të vendbanimeve nën sipërfaqe,  shtrirjen  e  tyre, evidentimin  e kanaleve rrethuese, gropat  e mëdha dhe banesat e djegura, pa kryer gërmime arkeologjike. Pas përpunimit të të dhënave të studimit gjeofizik, rezultatet do të prezantohen në konferencën vjetore të Institutit të Arkeologjisë”, thuhet nga Akademia e Studimeve Albanologjike (ASA). Materiali arkeologjik i grumbulluar dhe përpunimi i tij paraprak kanë ofruar informacion jo vetëm për praninë e vendbanimeve neolitike, por edhe të periudhave të tjera prehistorike dhe historike. Akademia e Studimeve Albanologjike ( ASA) bën me dije më tej se pjesë e rëndësishme e ekipit ishin studentë të Departamentit të Arkeologjisë dhe Trashëgimisë Kulturore të Universitetit të Tiranës dhe studentë të Departamentit të Arkeologjisë të Universitetit të Këlnit. Ky projekt në fushën e arkeologjisë vjen në vijim dhe të atyre, që janë bërë me dije më parë nga ASA.