MEKI dhe IKTK prej tre vitesh pjesë e celebrimit të Ditëve të Arkeologjisë

Ministria Franceze e Kulturës që nga viti 2010 i ka besuar Institutit Kombëtar për Kërkime Arkeologjike Parandaluese (INRAP) bashkërendimin dhe promovimin e Ditëve Kombëtare të Arkeologjisë të Francës (JNA). Drejtoria Rajonale e Trashëgimisë Kulturore Shkodër shkruan mes të tjerave se prej tre vitesh Instituti Kombëtar i Trashëgimisë Kulturore dhe Ministria e Ekonomisë, Kulturës dhe Inovacionit është pjesë e celebrimit të Ditëve të Arkeologjisë, ku sëbashku me institucione partnere janë të angazhuar për të njohur publikun me thesaret e trashëgimisë kombëtare dhe sekretet e profesionit. “Operatorët e gërmimeve arkeologjike, organizatat kërkimore, universitetet, muzetë dhe vendet arkeologjike, laboratorët, shoqatat, arkivat dhe autoritetet lokale inkurajohen të organizojnë aktivitete novatore, origjinale dhe ndërvepruese për publikun e gjerë”, thuhet nga DRTK. Në vijim DRTK Shkodër thotë se në vitin 2020, Ditët Kombëtare të Arkeologjisë së Francës u bënë Ditët Evropiane të Arkeologjisë (EAD). “Mirënjohje për të gjithë partnerët shqiptarë dhe të huaj për punën e palodhur, plot pasion për të çuar përpara projekte kërkimore në bashkërendim me institucione kërkimore europiane, të cilat prej vitesh janë instaluar në arealin e veriut të vendit, duke sjell vit pas viti të dhëna të reja mbi shtresëzimet kulturore, urbanizimin dhe stadin social të popullsive në këtë territor”, thuhet nga DRTK Shkodër, që ka ndarë në faqen e saj dhe foto dhe imazhe nga misionet kërkimore në Shkodër, Lezhë, Bushat, Sardë, Koman.