Redaksia e "Enciklopedisë shqiptare" mblidhet për informacionin rreth përgatitjes së listave të njësive enciklopedike

Mbledhja e radhës e redaksisë vendore të "Enciklopedisë shqiptare" u organizua për të shkëmbyer informacion rreth përgatitjes së listave të njësive enciklopedike sipas fushave, diskutimit të tyre me redaksitë gjegjëse në Kosovë, krijimin e listave të përbashkëta dhe stabilizimin e tyre duke shmangur përsëritjet e duke barazuar nivelet e përfaqësimit, me qëllim që cilësia e enciklopedisë të mbrohet. Akademia e Shkencave bën me dije se anëtarët e redaksisë vendore raportuan sipas grupfushave që mbulojnë në ndarjen e punës. “Deri sot 13 redaksi i kanë këmbyer listat dhe janë dakordësuar për fjalësin e përbashkët. Pritet që deri në fillim të javës edhe dy redaksi të kenë arritur në fjalësin e përbashkët, ndërsa deri rreth datës 25 qershor së paku listat do të jenë këmbyer edhe nga pjesa tjetër”, thuhet nga ASH. Po sipas akademisë, në mbledhje u konstatua dhe u vlerësua si arritje pozitive fakti që fjalësi i përgatitur nga redaksitë ka një shkallë të dukshme pavarësie ndaj fjalorëve enciklopedikë. Referuar numrit të përgjithshëm të njësive që do të përmbajë Enciklopedia (10 mijë njësi) rezulton një prirje për tejkalim, dhe kjo sipas ASH-së do të thotë se duhet të thellohet seleksioni, sidomos në grupimin e personaliteteve, që mund të gjejnë vend në njësitë tematike dhe në artikujt përmbledhës. “Raporti "një në tri njësi" për personalitetet duhet ruajtur, ky është raport klasik edhe në enciklopeditë e popujve të tjerë, me numër më të madh figurash të së shkuarës e të së sotmes”, bën me dije ASH. Gjithashtu në këtë mbledhje që u zhvillua në ASH, u theksua rëndësia e shembujve që duhet të përgatisin redaksitë e fushave dhe "gjetja e të barabartëve" ndër personalitetet, vendet dhe ngjarjet. Po ashtu u kërkua integrimi i fjalësit të propozuar nga redaksia e posaçme e trashëgimisë shqiptare në Maqedoninë e Veriut në listat e përbashkëta. Sipas ASH-së ruajtja e raporteve midis fushave në peshën e tyre specifike kundrejt veprës në tërësi dhe me njëra-tjetrën ishte një tjetër çështje e diskutuar.