Simpoziumi historik "Batifoli dhe Kodikët e Beratit" në muzeun “Onufri”

"Batifoli dhe Kodikët e Beratit" ishte simpoziumin historik që organizua nga Qendra Kombëtare e Muzeumeve Berat në bashkëpunim me Museo Diocesano e del Codex Kalabri, Itali. QKMB shprehet se mes shumë të ftuarve ishin të pranishëm edhe krerët fetare të të gjitha komuniteteve fetare në Berat. Përshëndetën eventin Arqipeshkvi katolik i Shqipërisë së Jugut Giovani Peragine dhe Arqipeshkvi i Rossano Calabro Itali Maurizio Aloise. “Referuesit sollën fakte të reja mbi jetën dhe kontributet e Batifolit në historinë e kodikëve dhe trashëgiminë e Beratit, tipologjinë e shkrimit të shenjtë në dorëshkrimet historike dhe një histori e muzeut ikonografik “Onufri” me sfidat që sjell e ardhmja në situatën e suksesshme të turizmit në Shqipëri”, thuhet nga QKMB. Materialet e referuara sipas QKMB-së shumë shpejt do jenë të publikuara në formë elektronike. Miqtë nga Rossano Calabro ekspozuan për publikun një kopje të Kodikut të tyre ( Codex Purpureus Rossanensis) që është i së njëjtës tipologji e periudhë me Kodikun e Purpurtë të Beratit (Codex Purpureus Beratinus 1). QKMB shprehet se ky event hodhi bazat e një bashkëpunimi në të ardhmen për promovimin dhe evente shkencore në dobi të kulturës, trashëgimisë dhe vlerave të bashkëjetesës fetare. Ndërkaq që dhe drejtori i Përgjithshëm i Arkivave Ardit Bido zhvilloi një takim me Imzot Maurizio Aloise-n,  arqipeshkvin e Rossano-s dhe me Dom Giuseppe Straface-n, drejtorin e Muzeut të Kodikut të këtij qyteti, që zotëron simotrën e “biblës tonë perandorake” të strehuar në DPA, Kodikut të Beratit. Si rezultat i bisedimeve, palët ranë dakord për prezantimin për herë të parë të këtyre dy thesareve të paçmuara të historisë së njerëzimit në dy ekspozita, që do të mbahen në Shqipëri dhe në Itali. Po ashtu, bashkëpunimi do të vijojë edhe përmes një botimi anastatik të përbashkët. Aktiviteti u zhvillua në sallën qendrore te muzeut ikonografik “Onufri” në Berat.