Vepra e Kadaresë vjen përmes poezisë dhe muzikës në COD

Një mbrëmje artistike kushtuar shkrimtarit Ismail Kadare nëpërmjet filmit dhe interpretimit në Qendrën për Hapje dhe Dialog-COD. Përmes poezisë dhe muzikës erdhi në COD vepra e Kadaresë, me interpretimin e aktorëve Anila Dervishi dhe Arbër Aliaj, shoqëruar nga tingujt e harpës nga Aida Kasmi dhe të flautit nga Enalda Gjoni. Pas performacës të pranishmit ndoqën filmin dokumentar "Frymëzime Kadareane" të skenaristit dhe të fabulistit të njohur Ferit Lamaj, që e solli shkrimtarin dhe veprën e tij në një dimension tjetër. Ismail Kadare anëtar i Akademisë së Shkencave të Shqipërisë është cilësuar jo vetëm si ndër shkrimtarët më të mirë të letërsisë shqipe, por edhe ndër shkrimtarët më të mirë të letërsisë botërore bashkëkohore. Fillimet letrare të Ismail Kadaresë janë kryesisht në poezi. Veprat e tij janë përkthyer e botuar në mbi 45 gjuhë të huaja. Ai është shkrimtari shqiptar më i njohur në botë. Ndër veprat më të njohura të Kadaresë në nivel kombëtar dhe ndërkombëtar janë: Gjenerali i ushtrisë së vdekur, Kështjella, Kronikë në gur, Dimri i madh, Ura me tri harqe, Prilli i thyer, Dosja H, Piramida, Pallati i ëndrrave, Darka e gabuar. Ismail Kadare është laureat i shumë çmimeve letrare kombëtare dhe ndërkombëtare. Në vitin 2005 fitoi çmimin “The Booker Prize Man”. Në vitin 2010 Ismail Kadare nderohet në Itali me çmimin “Lerici Pea” dhe në vitin 2009 u nderua me çmimin Princi Asturias e një sërë të tjerësh. Në vitin 2015 fiton çmimin “Jerusalem Priz”, (Izrael). Ismail Kadare është dekoruar me Urdhrin “Nderi i Kombit” dhe nga shteti francez me urdhrat “Kryqi i Legjionit të Nderit” e “Oficer i Legjionit të Nderit”, si dhe me mirënjohje të tjera.