Nis ndërhyrja shpëtuese në Urën e Zogut, në vitin 2022 u shpall në listën e pasurive në rrezik nga “Europa Nostra”

Në urën e Matit, e njohur si Ura e Zogut kanë nisur punimet përforcuese. Ura është monument kulture, ku punimet u inspektuan dhe nga ministri i Ekonomisë, Kulturës dhe Inovacionit Blendi Gonxhja. Ministri Gonxhja shprehet se ura është krenari kombëtare që lidhi brigjet e Matit që prej 26 majit 1927. Ai shkruan në rrjete sociale se Ura e Matit është një prej veprave më të veçanta inxhinierike në Ballkan dhe njihet si një nga veprat e para inxhinierike, të këtyre përmasave, të shtetit shqiptar. Projektuar nga inxhinieri zviceran Erwin Schnitter dhe ndërtuar nga firma triestine "Mazorana & Co Triest", nën drejtimin e inxhinierit Gjovalin Gjadri, ura e gjatë 480 metra u ndërtua me gjashtë harqe (kampata), secili nga 54 metra. Ministri Blendi Gonxhja shprehet në rrjete sociale se edhe pse një prej pjesëve u dëmtua gjatë Luftës së Dytë Botërore, ura mbetet një dëshmi e forcës krijuese dhe elegancës. “Sot, ky monument kulture, në listën e pasurive në rrezik nga “Europa Nostra”, i është nënshtruar falë financimit nga qeveria Shqiptare, një ndërhyrjeje shpëtuese, si fazë e parë përforcuese, dhe në vijim pason restaurimi thelbësor, ku ekspertët po verifikojnë thellësinë e zhytjes së themelit dhe ndërthurjen e strukturës mbajtëse të çeliktë me këmbën e urës, veçanërisht për shkak të ndërtimit në mjedis me ujë dhe për shkak të cedimit dhe animit të këmbës së urës. Ky projekt pritet të kthejë për publikun, për qëllime panoramike e pelegrinazhi, një tjetër objekt trashëgimie, të aksesueshëm e të kalueshëm nga vizitorët dhe të shfrytëzueshëm për komunitetin e zonës”, thuhet nga ministri. Ura e Zogut monument kulture në vendin tonë në mars të vitit 2022 u shpall në listën "7 vendndodhjet më të rrezikuara të Europës".  Ura e Zogut monument kulture  është një nga më të veçantat për strukturën e saj arkitekturore, stili i harqeve i japin asaj vlerë muzeore.