Ja kush është i burgosuri “VIP” që zbuloi të gjitha krimet e Sali Berishës dhe Ilir Metës në vitin 2018, SPAK duhet t’i japë statusin e të penduarit të drejtësisë, Idajet Beqiri zbardh prapaskenat e bujshme dhe tregon si shmang hetimi i Shkëlzen Berishës nga afera e koncesioneve në shëndetësi

Avokat i njohur, Idajet Beqiri ka shpërthyer në sulme dhe akuza të forta në adresë të ish-kryeministrit Sali Berisha dhe presidentit të Partisë së Lirisë, Ilir Meta. Gjatë një interviste për gazetën “SOT”, avokat Beqiri tregon se kush është i burgosuri “VIP” që zbuloi të gjitha krimet e Sali Berishës dhe Ilir Metës qysh në vitin 2018, ndërsa thekson se SPAK duhet t’i japë statusin e të penduarit të drejtësisë. Po ashtu, Beqiri zbardh prapaskenat e bujshme dhe tregon se kush e shmangu hetimin Shkëlzen Berishës nga afera e koncesioneve në shëndetësi. Sipas tij, është jashtëzakonisht e madhe dhe për turpin dhe të Grupit Parlamentar të PS, por edhe krye turpin e Grupit Parlamentar të PD edhe në Komisionin Hetimor, se me që është Shkëlzen Berisha dhe familja Berisha te koncesioni i Dializës, nuk e futën as për në hetim. Ndër të tjera gjatë intervistës me kryeredaktorin e gazetës “SOT”, Rigels Seliman, juristi Beqiri zbulon shkeljet që ka bërë ish-ministri i Shëndetësisë, Ilir Beqaj dhe pse rrezikon të arrestohet me urdhër të SPAK.

-Avokat Beqiri, qarkullon një lajm prej ditësh në median shqiptare që shumë shpejtë do të vij një mega operacion nga SPAK-u, një paralajmërim bombë sepse thuhet se bëhet fjalë për 40 urdhër arreste dhe pjesë e kësaj liste janë prokurorë, gjyqtar, polic, anëtar të botës së krimit e madje dhe politikanë?

Problemi është që ky vend duke qenë një vend ku nuk ka sunduar ligji, për afro 30 vite dhe ku ka patur të pandëshkueshëm nga të gjitha fushat, nga krimi i organizuar, nga krimi ordiner sepse në një mënyrë apo në një tjetër kanë ditur që ta blejnë edhe ta mënjanojnë drejtësinë e të marrin pafajësinë  kur kanë qenë të fajshëm, thjesht dhe vetëm se e kanë patur xhepin plotë. Një vend i tillë që është i mbytur në krim, posaçërisht një vend i tillë ku politika në këtë vite nuk ka menduar shumë për ta qeverisur këtë vend dhe për të rritur mirëqenien e popullit por pushtetin e kanë blerë, e kanë vjedhur, e kanë marrë thjesht dhe vetëm që të kenë privilegje për veten e tyre, të mbushin xhepat e tyre dhe ta varfërojnë në maksimum. Një vend i tillë që sa herë që thellohesh në hetime, nxjerr mega operacione. Këto janë gjëra shumë të mira dhe tregojnë atë që Struktura e Posaçme e Krimit kundër Korrupsionit të Organizuar, është në detyrë dhe po punon e po lëviz sikurse gjykata e Posaçme, sepse SPAK-u është njëra anë por ajo do të ishte e paplotë dhe do të ishte e vdekur nëse do të ishte një Gjykatë të Posaçme të Krimeve dhe kundër korrupsionit dhe Krimit të Organizuar pasi ajo ia finalizon, të gjitha veprimet që bën. Duke qenë këto struktura në punë, ne na vjen mirë që krimi dhe kriminaliteti në këtë vend, që janë dy plagët më të rënda të Shqipërisë, sot ka përparime dhe po ecën. Gjithsesi, problemi te SPAK-u është që nuk është krijuar vetëm për këto vepra penale që shkojnë nëpërmjet përgjimeve të ndryshme, i shkojnë me ndihmën e partnerëve ndërkombëtar, i shkojnë me ndihmën e përgjimeve speciale që janë bërë në Francë dhe në Belgjikë. Ne presim nga SPAK-u të finalizojë dhe t’u jap përgjigje atyre kallëzimeve penale e atyre dosjeve të rënda që i ka të hapura, por që i mban në mënyrë hilanjoze, pa emër autori, thjesht dhe vetëm që të fitojë kohë  e të zgjasë kohën e saj me qëllim që të mos i kalojnë afatet e hetimit dhe asnjë prej tyre nuk po çon në Gjyq.

-Kujt i trembet SPAK, pse stepet se thatë që i mban më mënyrë hileqare?

Po, është e vërtetë kjo. Puna është se SPAK, sikurse e shikojmë, padrejtësisht mendon se nëpërmjet numrit të madh të njerëzve që çon në gjyq, këtyre grupeve kriminale e duke lëshuar urdhër arreste ku ne fillim ishin 25, më pas 41 e tani thuhet për mbi 150 urdhër-arreste, por nuk është çështja vetëm për shifra, me statistika ato janë mirë. Por me cilësinë e luftës kundër krimit të organizuar dhe korrupsionit të lartë shtetëror, ata e filluan mbarë, por sa u zgjuan nga gjumi e në fillim punuan mirë, pasi morën përgjegjësi penale, ish-kryeministrin dhe ish-presidentin e vendit, për një aferë të hapur dhe që ishte e dukshme korruptive, ku pas asaj afere shqiptarët prisnin që pas asaj afere të vinin dhe 130 afera të tjera të Berishës dhe familjes së tij. Të vinin dhe 140 afera të tjera të Ilir Metës me familjen e tij dhe bashkëpunëtorëve të tyre me radhë. Ne pamë që SPAK tani ia ka futur gjumit dhe mendon sikur ua mbushi mendjen shqiptarëve, ia mbushi mendjen këtij vendi me këto mega operacione për gjëra të vogla, e madje dhe ato për prokurorë e gjykatës e me radhë në raport me kriminalitetin e rëndë dhe aferat e rënda korruptive që kanë ndodhur e me grabitjet e mëdha dhe vrasjet skandaloze që janë bërë në këtë vend.

-Është strategji e SPAK që nuk ka kërkuar asnjë masë sigurie ndaj personave që keni denoncuar apo thjesht nuk ka arritur me anë të hetimeve të ngarkojë me përgjegjësi këta persona?

Pikërisht ditën e premte (7 qershor) i kam dërguar një shkresë SPAK për dijeni ia kam dërguar dhe Komisionit të Ligjeve të Parlamentit dhe Këshillit të Lartë të Prokurorisë, ku i them SPAK që keni një mori aferash, çështjesh, denoncimesh me prova të pa kontestueshme dhe ju thjesht dhe vetëm duhet që t’i formësoni dosjet, t’i merrni në pyetje e të deklaroheshin këto persona që i kanë bërë këto afera të rënda korruptive. Posaçërisht, Sali Berisha, Ilir Meta dhe grupi e organizata e tyre kriminale, ku ndër vite, por edhe me afera konkrete, në vend që t’i dërgoni në gjyq, ju nuk po veproni. Më konkretisht iu thash se në vitin 2018, një ndër dëshmitarët okular, i cili kërkonte që të bëhej dhe i penduari i drejtësisë, pasi në disa vepra penale ka qenë vetë i pranishëm e i ka parë me sytë e tij dhe ka qenë prezent në ngjarje. Njëri prej tyre është Izet Haxhia dhe i thashë SPAK se e keni marrë në pyetje për seanca të tëra dhe keni marrë prej tij prova, fakte, dëshmitarë, krime nga më të rëndat e deri te vrasjet mizore e akte terroriste e vjedhje bankash, deri në 140 faqe kompjuterike. U kam drejtuar një kërkesë më parë dhe më thanë që jemi duke i hetuar këto çështje por nuk kemi regjistruar autorët. Ne autorët ia kemi dhënë me emër e mbiemër. Dhe Izet Haxhia ia ka dhënë me emër e mbiemër që janë subjekte të SPAK që prej vitit 2018. Tani çfarë pret SPAK, nga 2018-ta, plotë 6 vite dhe sot nuk ka asnjë përgjigje. E tani presim të na jap një përgjigje jo vetëm SPAK-u por edhe Komisioni i Ligjeve të Parlamentit dhe Këshilli i Lartë i Prokurorisë, i cili tashmë duhet të veprojë. Këtu nuk vepron SPAK, pasi me sa duket ky i fundit komandohet nga një lloj plani e strategjie ku goditjet i do me planifikim, me muaj, me stinë.

-Koncesioni i Sterilizimit, shtyhet sërish seanca gjyqësore në ngarkim të zotit Beqaj, keni një koment iu lutem?

Ilir Beqaj dhe të gjithë ato të tjerët e kanë dosjen tashmë në Gjykatë. SPAK-u e ka bërë punën e vetë dhe e ka çuar në Gjykatë. Kuptohet, ka çuar një pjesë, nuk ka çuar aferat e tjera sepse i mban dhe mirë do të ishte që t’i kishte bashkë dhe bashkë me këtë grup që ka dhe që e konsideron grup të strukturuar kriminal, që kanë bërë këto afera në fushën e mjekësisë, me sterilizimin, etj. Duhet ta çonin dhe për dializën, ta çonin me gjithë bandën dhe organizatën kriminale të Sali Berishës, Shkëlzen Berishës, Allajbeut, etj, me radhë sepse nuk është aferë e vogël dhe ajo e dializës. Është jashtëzakonisht e madhe e për turpin dhe të Grupit Parlamentar të PS, por krye turpin e Grupit Parlamentar të PD edhe në Komisionin Hetimor, me që është Shkëlzen Berisha dhe familja Berisha te dializa, nuk e futën as për në hetim. E me sa duket bëjnë hesape reciproke, por kjo çështje pra, pjesa e saj është e do ta marr drejtimin. Ilir Beqaj për sa ka bërë, akuzohet për shpërdorim detyre, e akuzojnë për atë që ka bërë dhe do të marrë dënimin e merituar nga Gjykata nëse d t’i provohet plotësisht fajësia. Dhe Gjykata do e provojë akuzën e SPAK, do ta konsiderojë ligjore dhe të mbështetur në prova. Kjo është një çështje që nuk ka kthim mbrapa.

Intervistoi: Rigels Seliman