"Presion ndaj SPAK", Luçiano Boçi zbulon 'kodet' e komunikimit të Ramës në mbledhjen e grupit socialist: Pranoi që ka njerëz nga politika, oligarkë që 'pushtojnë' hapësirën e biznesit

Nënkryetari i Rithemelimit, Luçiano Boçi, për mesazhet e kryeministrit Edi Rama për opozitën thotë se ftesa për opozitën nuk duhet të mbesë fjalësore.

Nga një studio televizive, Boçi deklaroi se Edi Rama ka pasur rast që ftesat t’i realizojë me hapësirën në parlament, duke shtuar marrëveshjet parlamentare janë ato që prevalojnë mbi marrëveshjet e tjera.

"Është hipokrizi se opozita sjelljen e saj në raport me integrimin e ka treguar qoftë me votimin e ligjeve por edhe nismave në favor të hapjes së negociatave.

Nuk mund të nihilosh gjithë rrugën që ka bërë Shqipëria, duke mohuar gjithçka dhe në fund të jesh ti ai që dukesh sikur i ka bërë të gjitha.

Është e faktuar që Edi Rama bllokoi pesë ligjet për statusin e vendit kandidat, këto janë fakte dhe të vërteta që Rama ka lozur kundër integrimit të Shqipërisë.

Ne i kemi hapur negociatat. Opozita nuk ka nevojë që ti bësh thirrje, se nuk është penguese.

Sot komisioni i Integrimit drejtohet nga përfaqësuesja e PD dhe nuk ka pasur asnjë pengesë.

Thirrja është hipokrite, për t’i hedhur hi syve njerëzve."

Në vijim Boçi shtoi se në vitin 2013 Edi Rama erdhi me sloganin, se edhe kur nuk punonte një llambë në bulevard fajin e kishte Saliu dhe se ishte përgjegjësia e kryeministrit për gjithçka nuk shkonte mirë.

"Fjalimi i Edi Ramës ishte propagandë e pastër, i mbushur me mllef dhe me mohimin e të vërtetave.

Ky ishte ai që kishte shpikur shtetin në Shqipëri dhe paraardhësit që nga 1913 nuk kishin bërë asgjë në raport me institucionet, drejtësinë dhe shtetin.

Në një kohë që tashmë korrupsioni ka kapur nga majat deri te nëpunësi më i thjeshtë.

Rama përmendi policinë që është pastruar, ishte dhe një presion ndaj SPAK i cili ka dalë nga mitra e PS.

Po si mund të jetë i pavarur SPAK kur ka dalë nga PS? Veliaj duhet të ishte thirrur në SPAK para dy vitesh për inceneratorin.

Por kryesori që duhet të ishte thirrur në SPAK për dijeninë e tij është kryeministri dhe është e pavërtetë që vendimet janë marrë me dakordësi.

Gjithçka ishte për t’iu hedhur hi syve shqiptarëve. Për mua e mbrojti Veliajn, nuk e lëshoi, thjesht donte të thoshte që nuk ka ndikim mbi SPAK.

SPAK është treguar që vepron me regji dhe është e pabesueshme se një produkt i dalë nga PS, nuk ka presion.

Sigurisht që ka presion, se e mbrojti ai Ilir Beqajn. Ndërkohë SPAK është vënë në lëvizje nga denoncimet e opozitës.

Nuk ka sekuestro për pronat e drejtorëve të "5D".  Përmendja e oligarkëve nga Rama ky është rasti i parë.

Madje e ka përdorur dhe si kartë lufte ndaj opozitës, kur përmendeshin emra oligarkësh.

Ky njeri pranon që ka oligarkë, që janë njerëz që vijnë nga politika dhe pushtojnë hapësirën e biznesit.

Janë biznese që i ka krijuar ky politikisht si '5D'. ", tha Boçi