Reforma Territoriale, PD dhe PS caktojnë ekspertët teknik, javës tjetër nisin dëgjesat me shoqërinë civile dhe grupet e interesit

Opozita dhe mazhoranca janë mbledhur në Komisionin e Posaçëm për Reformën Territoriale, ku janë caktuar emrat e ekspertëve teknik. Në mbledhjen e kaluar u refuzua kërkesa që të shtoheshin ekspertët e grupeve parlamentare nga 4 në 6, ndërsa kryetarja e Komisionit Anila Denaj bëri një propozim për javën e ardhshme për tu ezauruar dëgjesat me organizatat e shoqërisë civile dhe tha se presin nga Kuvendi për një përgjigje formale nëse do të ketë shtesë në mënyrë që të mos pengohet fillimi i punës të ekspertëve që janë definuar. Nga mazhoranca u propozuan dy ekspertë teknikë: Adelina Farrici dhe Artan Shkëmbi. Nga opozita u propozuan Agron Haxhimali dhe Roland Bejko në cilësinë e ekspertëve teknik në këtë komision. Ndër të tjera, Xhelal Mziu ka dhënë propozimin e tij që të merret eksperiencë nga vendet e rajonit për Komisionin e Posaçëm për Reformën Territoriale. “Unë do të propozoja ekstra që mendoj se do të jepnin kontribut të jashtëzakonshëm për të përfituar atë reformë të cilën do i eliminonte problematikat që janë përcaktuar deri më sot dhe që do të ishin më afër standardeve të vendeve të BE. Ngul këmbë që Komisioni i Reformës Territoriale duhet të gjejë modalitetin me Kosovën, me Malin e Zi dhe Maqedoninë e Veriut. Nuk po them që t'i ftojmë ato për të dëshmuar këtu para nesh apo për të kontribuar, por them nuk është luks i tepërt që ky Komision të ndërmarrë një tur të shpejtë në këto 3 vende për të parë risitë e tyre në raport me ne dhe jam i sigurt që kanë më shumë kompetenca se ne dhe që të mos shkojmë te shpikja e rrotës, por të bëjmë implementimin e standardeve që kanë evoluar më shumë. Të treja kanë risi që janë më shumë se ne, por jam i sigurt që do të kontribuojnë maksimalisht për një reformë komplekse jo vetëm në një aspekt”, deklaroi Mziu.

Çupi: Reforma Territoriale e vitit 2014 dështoi

Ndërkohë, deputetja Dhurata Çupi ka thënë se Reforma territoriale e vitit 2014 dështoi. Në mbledhjen e parë të Komisionit për këtë reformë, Çupi në rolin e bashkëkryetares u shpreh se kjo reformë ka dështuar, pasi sipas saj, nuk ka garantuar shërbim për qytetarët dhe nuk ka ulur numrin e zyrtarëve lokalë të punësuar. Sipas bashkëkryetares demokrate, nga 19 mijë të punësuar në komuna dhe bashki që ishin në 2014, sot janë 39 mijë.“Reforma Territoriale ka dështuar, tani duhet t’ua kthejmë atë qytetarëve. Synojmë decentralizimin e pushtetit vendor, dhënien e shërbimit publik sa më pranë qytetarëve dhe largësia e madhe gjeografike. Synimi tjetër ishte ai për vetëqeverisje lokale, por kryebashkiakët janë të varur nga pushteti qendror. Jemi të detyruar t’i kthehemi reformës, sepse nuk ka arritur atë pritshmëri që pritej. Sot nga 2014 me 19 mijë punonjës të bashkive dhe komunave, ne sot kemi 39 mijë. Ndërkohë që synim ishte shkurtimi i stafeve”, u shpreh Dhurata Çupi, bashkëkryetare e Komisionit Parlamentar për Reformën Territoriale.