Salianji: PS dhe bandat janë bërë një, kryebashkiaku i Tropojës i fryrë nga korrupsioni, do bëjmë të pamundurën që ky të jetë viti i fundit i Ramës në pushtet

Deputeti demokrat Ervin Salianji tha dje nga Tropoja se PS ka fituar zgjedhjet, duke bashkëpunuar me bandat në mbarë vendin. Salianji tha se kryebashkiaku i Tropojës Rexh Byberi është fryrë nga korrupsioni. Sipas tij, PD sot qëndron e bashkuar dhe me parime, ndërsa PS vijon bashkëpunimin me banditët. “Tropoja dhe Shqipëria duhet të jenë krenarë për Sali Berishën dhe Azem Hajdarin. Ne i kemi dhënë fund betejave të brendshme, që kanë çuar ujë tek kundërshtari. Gjithçka kemi kaluar duhet të na shërbejë për reflektim. Kemi bërë gabime në përçarje e ne duhet të shikojmë me kujdes gjithçka. Në 11 vite qeverisje të Ramës, gjithçka ka shkuar keq. PD ka njerëz krenarë, që qëndrojnë në bindjet e tyre. Kryebashkiaku i Tropojës është fryrë nga korrupsioni, kur ishte me PD ishte i keq sipas Ramës, kur u bë me PS qenka i mirë. Ne kemi përmendur Bajrat dhe bandat e tjera në Shkodër, i kemi denoncuar me emra. Pastaj thonë fiton PS. Nëse bëhet luftë bandash, edhe ju që keni mbetur do merrni arratinë. Ne kemi vendosur të qëndrojmë me vlera. Ne kemi denoncuar Arben Ndokën. E pate Ndokën që bëhej me bandat në gjithë Shqipërinë për të vrarë njerëz. Kontrolli në territor ka qenë i bandave bërë njësh me shtetin, edhe zgjedhjet janë fituar në sajë të bashkëpunimit me banda. Bandat i kanë shërbyer shtetit dhe shteti më pas iu ka shërbyer bandave. PS dhe bandat janë bërë një. Po hymë në vitin e fundit të qeverisjes së Ramës dhe do të bëjmë të pamundurën që ky të jetë viti i fundit i tij dhe sektit të tij në qeverisje”, u shpreh Salianji.