Vazhdon procesi gjyqësor ndaj ish-krerëve të UÇK-së, nga Thaçi te Krasniqi do të përballen sot ndaj një tjetër seance në Hagë

Në Dhomat e Specializuara të Kosovës në Hagë sot (27 maj) do të vazhdojë procesi gjyqësor ndaj ish-krerëve të Ushtrisë Çlirimtare të Kosovës  Hashim Thaçit, Kadri Veselit, Rexhep Selimit dhe Jakup Krasniqit.

Kujtojmë se të enjten e 23 mait dha dëshminë e tij dëshmitari i 66-të i Zyrës së Prokurorit të Specializuar.

 Ky dëshmitar ishte me masa mbrojtëse dhe dëshmoi për herë të parë.

Gjatë seancës së të enjtes kryetari i trupit gjykues, Charles Smith III njoftoi se orari i dy seancave pasuese është paksa i pazakontë dhe në njërën prej këtyre planifikohet që të mbahet një diskutim për ecurinë e çështjes.

Smith III ka theksuar se ka mundësi që një gjë e tillë të ndodhë sot gjatë seancës së pasdites.

Aktakuza e parë kundër katër të akuzuarve u konfirmua më 26 tetor 2020 dhe u bë publike më 5 nëntor 2020. Sipas aktakuzës, krimet e paraqitura në të u kryen prej muaj mars të vitit 1998 deri në shtator 1999 në disa vendndodhje në Kosovë, si edhe në Kukës dhe Cahan, në Shqipërinë Veriore.