Krijohet Agjencia Kombëtare e Zonave të Mbrojtura, do ruajë biodiversitetin

Qeveria ka miratuar dje vendimin për ngritjen e Agjencisë Kombëtare të Zonave të Mbrojtura, e cila ka për detyrë të kujdeset për këto zona. Ekzekutivi e ka parë si shumë të nevojshëm ngritjen e kësaj agjencie, e cila do të kontribuojë në ruajtjen dhe kujdesin ndaj natyrës e biodiversitetit, nëpërmjet menaxhimit të rrjetit të zonave të mbrojtura me interes kombëtar e ndërkombëtar.

 

Po ashtu do të kontribuojë në mbledhjen dhe shpërndarjen e informacionit, edukimit mjedisor dhe ndërgjegjësimit të publikut për zonat e mbrojtura dhe mbështetjes së aktiviteteve të qëndrueshme ekonomike brenda këtyre zonave. Ajo do ta ketë selinë në Tiranë dhe do të varet nga ministri i Mjedisit. Sa i përket financimi të saj në vendim thuhet: “AKZM-ja është institucion buxhetor, që financohet nga buxheti i shtetit dhe nga burime të tjera të ligjshme. Buxheti i AKZM-së përbën zë të veçantë në buxhetin e ministrisë përgjegjëse për zonat e mbrojtura. AKZM-ja siguron të ardhura edhe nga shërbimet e kryera prej saj ndaj palëve të tjera. Tarifat e këtyre shërbimeve përcaktohen sipas legjislacionit përkatës në fuqi. AKZM-ja administron të ardhurat nga buxheti i shtetit dhe ato të siguruara nga donacionet dhe shërbimet ndaj palëve të tjera, sipas legjislacionit përkatës në fuqi. AKZM-ja harton projektbuxhetin vjetor në bazë të projektprogramit vjetor të saj dhe ligjit nr.9936, datë 26.6.2008, “Për menaxhimin e sistemit buxhetor në Republikën e Shqipërisë”, të cilin ia përcjell ministrisë përgjegjëse për zonat e mbrojtura”.  Në mbledhjen e djeshme ekzekutivi ka përcaktuar edhe detyrat dhe përgjegjësitë e këtij institucioni.

 

Disa prej detyrave janë: “Të menaxhojnë rrjetin e zonave të mbrojtura, habitateve dhe llojeve natyrore e gjysmënatyrore me interes të ruajtjes, sipas ligjeve kombëtare dhe konventave e marrëveshjeve ndërkombëtare. Promovojnë dhe mbështetin grumbullimin dhe shpërndarjen e informacionit, edukimin mjedisor dhe ndërgjegjësimin e publikut për zonat e mbrojtura. Të mbështesë zhvillimin e aktiviteteve të qëndrueshme ekonomike brenda zonave të mbrojtura”.

 

Krijimi i kësaj agjencie do të shërbejë edhe për hapjen e vendeve të punës, pasi do të ketë një staf prej 224 personash, nga të cilët 21 në zyrën qendrore dhe 203 në Administrata Rajonale të Zonave të Mbrojtura.