“Hamlet” në skenë, Laura Nezha nën petkat e Ofelisë: Një rol delikat

Tragjedia “Hamlet” është shfaqja e radhës që do të vijë në skenën e Teatrit Kombëtar Eksperimental “Kujtim Spahivogli”. Vepra e Shekspirit vjen pas disa ditësh në skenën e teatrit, janë të njëjtët aktorë që e sjellin atë në skenë, por këtë herë do të jetë aktorja Laura Nezha ajo që do të jetësojë personazhin e Ofelisë. E njohur në skenën e teatrit, aktores i është besuar një nga personazhet më të veçantë të kësaj shfaqjeje. Gjatë kësaj kohe aktorja ka pasur në vëmendje punën për rolin në veprën me regji nga Enke Fezollari. Ajo tregon se personazhi i Ofelisë është një rol delikat. “Me përkushtim maksimal, ashtu si për çdo punë tjetër, por ky rol është delikat. Është personazhi, që më së shumti pëson, prandaj kërkon kujdes në ruajtjen e balancave”, thotë aktorja. Sipas saj, këtë herë personazhi i Ofelisë ishte një fat, një rol që brishtësia dhe pastërtia e bëjnë viktimë. “Ofelia është nga ato personazhe kyç të historisë së dramaturgjisë botërore, që s’ka krahasim, që një herë të vjen shansi për t'i interpretuar (nëse të vjen). Unë e pata këtë fat në kohën e duhur dhe po përpiqem ta njoh sa më thellë shpirtin e saj të bukur e të çiltër. Brishtësia dhe pastërtia e bëjnë viktimë të rrethanave e pre të intrigave për pushtet mbretëror deri sa ajo vetëvritet, prandaj është personazhi më tragjik që kam luajtur”, pohon aktorja. Por si do të vijë këtë herë Ofelia në tragjedinë “Hamlet” nën interpretimin e aktores Laura Nezha? “Ofelia është vajza që dashuron me pasion e sinqeritet, zhgënjehet rëndë, kalon në çmenduri e vetëmbytet. Unë do të sjell versionin tim sipas ndjesisë time, dhe e kam të vështirë ta përkufizoj. Pres mendimin e publikut si do ta vlerësojë”, shton më tej aktorja Nezha, që më datë 24, 25, 26, 27, 31 mars si dhe 1, 2, 3 prill do të jetë në skenën e Teatrit Kombëtar Eksperimental me tragjedinë “Hamlet”. Ndërsa për publikun këtë herë ajo do të jetë nën petkat e Ofelisë në veprën e Shekspirit, projekti më i fundit i saj në skenën e teatrit ishte në muajin dhjetor në komedinë "Më e vërtetë se e vërteta" në rolin e Kloe. Ndërkaq që aktorja tregon se në aktivitetin e saj në teatër, pret të mbylli me sukses këtë që angazhim që ka marrë përsipër me rolin e Ofelisë, dhe pastaj do të zgjedhë atë që do të pasojë.

 

 

 Me këtë rikthim të veprës në skenë, vjen dhe aktorja Luiza Xhuvani që interpreton për herë të parë në historinë e artit skenik shqiptar roli e Hamletit. Një rol mashkullor, të luajtur nga një femër. Në teatro të ndryshëm të botës, Hamleti është interpretuar nga aktore femra, por në teatrin shqiptar kjo është hera e parë. Nën regjinë e Enke Fezollarit, “Hamleti” i Shekspirit do të vijë nën një koncept bashkëkohor, duke e zhvendosur figurën e Hamletit nga mashkull në femër, duke rritur dimensionin përfshirës të veprës dhe të personazhit. Një Hamlet, i cili nuk do të ndryshojë për botën, por bota të ndryshojë për të, kështu shprehej kur vepra erdhi premierë më herët në skenë regjisori Enke Fezollari. “Një shoqëri ku vlerat e dashurisë janë si hipodromi apo si bursa. Me politikanë oportunistë, ku jetët njerëzore nuk janë veçse një parametër i luftës së tyre për pushtet. Ky është ferri që jeton Hamleti. Hamleti, njeriu i parë bashkëkohor, me ide dhe vlera. Kundër pushtetit të Klaudit dhe Polonit … ecën në shoqërinë e kalbur të “Danimarkës”, citonte Fezollari për konceptin e tij skenik. I ardhur nga një përvojë në teatrin grek ku punon prej vitit 2005, zgjedhja e tragjedisë angleze është një formë përmes së cilës ai i flet dhe aktualitetit. Hamleti Luiza Xhuvani, Ofelia Laura Nezha, në role të tjera do të interpretojnë aktorët: Andi Begolli, Endri Çela, Julinda Emiri, Anderson Gurra, Ina Gjoni, Ermir Jonka, Ilia Kaçi, Kristian Koroveshi, Ina Morinaj, Xhino Musollari.  Nga Julia Vrapi