Veprimtari kulturore në 125-vjetorin e lindjes së Lasgush Poradecit

Në 125-vjetorin e lindjes së Lasgush Poradecit u zhvilluan një veprimtari kulturore kushtuar poetit në Bibliotekën Kombëtare. Gjatë veprimtarisë organizuar nga Biblioteka Kombëtare e Shqipërisë dhe Ambasada Austriake në Tiranë u prezantua edicioni special i revistës së njohur letrare “Lichtungen” të Landit të Styria-s, e cila i kushtohet poetit të famshëm. Në revistën dygjuhëshe (gjermanisht dhe shqip) poezitë e Lasgush Poradecit mund të lexohen për herë të parë në gjermanisht, krahas teksteve të autorëve bashkëkohorë shqiptarë dhe austriakë. Në kuadër të këtij aktiviteti u çel edhe ekspozita e titulluar “Lasgush Poradeci në 125-vjetorin e lindjes”. Kjo veprimtari u zhvillua me pjesëmarrjen e nëndrejtores së BKSH-së, dr. Etleva Domi, Ambasadorit të Austrisë në Tiranë z. Christian Steiner, drejtores së Bibliotekës së Landit të Grazit, znj. Katharina Kocher-Lichem, artistja vizuale, Lori Lako, publikuesja e revistës “Lichtungen”, znj. Andrea Stift-Laube, albanologut z. Robert Pichler, përkthyesve, botuesve, studiuesve, studentëve, etj. Lasgush Poradeci (emri i vërtetë është Llazar Sotir Gusho) ka lindur më 27 dhjetor 1899 në Pogradec. Ai është liriku më i shquar i letrave shqipe. Lasgush Poradeci la pas një krijimtari të bukur, e cila kishte fituar zemrën e lexuesit dhe kishte tërhequr vëmendjen e disa studiuesve të shquar të kulturës sonë si Eqerem Çabej, Skënder Luarasi, Mitrush Kuteli, Sabri Hamiti, Ismail Kadare, Rexhep Ismajli, etj. Si një personalitet i shquar dhe poet i vërtetë ai nuk ua nënshtroi kurrë artin e tij kërkesave dhe synimeve të diktaturës. Vetëm në vitin 1989 mundi të botohet vepra e tij e plotë. Me 12 nëntor të vitit 1987, Lasgush Poradeci, vdiq, duke lënë pas një krijimtari që sot ka adhurues të shumtë.